ҚР Президентінің кеңесшісі Ақтөбе облысына жұмыс сапарымен келді

Қазақстан Республикасы Президентінің кеңесшісі Мәлік Отарбаев облыс орталығында орналасқан бірқатар нысандардың жұмысымен танысып, өңірдің зиялы қауым өкілдерімен, жастарымен кездесті.

Сағи Жиенбаев атындағы облыстық жасөспірімдер кітапханасына барған Мәлік Отарбаев Қазақстандағы ең алғашқы креативті орталықтың жұмысын көрді. Кітапханада оқырмандар үшін барлық жағдай жасалған. Қалаған кітабыңыздың аудио нұсқасын да тыңдауға болады.

Сағи Жиенбаев атындағы облыстық жасөспірімдер кітапханасының директоры Гүлжайнар Қалдинаның айтуынша, креативті орталық қысқа мерзім ішінде кеңінен танылып, жастар арасында ерекше қызығушылық тудыруда. Бір айдың ішінде келушілер саны 22 мыңнан астам адамға жеткен және нысанның танымалдығы күннен-күнге артып келеді.

Одан соң, ҚР Президентінің кеңесшісі облыстық тарихи-өлкетану музейіне барды, сондай-ақ, Қ.Жұбанов атындағы Ақтөбе өңірлік университетінің жұмысымен танысты. Оқу орнының Мәңгілік ел залында Мәлік Отарбаев облыс әкімінің орынбасары Бұлбұл Елеусіновамен бірге зиялы қауым өкілдерімен кездесу өткізді.

Жиында алдымен сөз алған Президент кеңесшісі мемлекеттік саясат туралы тілге тиек етті.

«Елдің тұтастығы, ел бірлігі, халықтың бейбіт заманда өмір сүруі — Мемлекет басшысы Қасым-Жомарт Тоқаевтың басты назарында. Қазір әлем тыныш емес. Әлемдік ахуал біздің елді сырт айналып өтпесі анық. Яғни, әлемдегі жағдай біздің экономикамызға, біздің саясатымызға әсер етпей қоймайды. Соңғы екі айда Мемлекет басшысы 25 елдің Президентімен кездесті. Бұл — аз жұмыс емес. Бұл кездесулердің басты мақсаты — ел қауіпсіздігін сақтау, елдің сыртқы саясатын, сауда-экономикалық байланыстырады нығайта түсу», — деді ол.

Кездесу барысында зиялы қауым өкілдері басқа да өзекті мәселелерді көтерді. Жиынды түйіндеген Мәлік Отарбаев әрбір мәселеге баса мән беріп, шешілу жолдарын қарастырып, Мемлекет басшысына жеткізуге уәде етті.

Сонымен қатар, М.Отарбаев ақтөбелік жастармен өткен еркін форматтағы кездесуге қатысты. Мұнда жастардың кәсіп таңдауына бағыт-бағдар беретін мәселелер талқыланып, өзекті ойлар айтылды. Президент кеңесшісі жастардың сұрақтарына жауап беріп, ұсыныс-тілектерін тыңдады.

• 21.11.2023
• 145