«Террикон алқабы» алаңында IT-қоғамдастықтың өкілдерімен кездестім

2021 жылдан бастап мұнда 450 стартаперлер мен компаниялар оқытылып, 10-нан астам инкубация және акселерация бағдарламалары өткізілді. Қысқаша айтар болсам, біздің мамандардың деңгейі жоғары. Бұған біз IT-хаб түлектерінің жобаларымен танысу барысында көз жеткіздік.   

Мысалы, «KZ Tranzit» компаниясы қазір инженерлік пластиктерді 3D басып шығарумен айналысады, осы арқылы сынған бөлшектерді қайта жасап, сонымен қатар медициналық импланттарды да әзірлейді.  
Ал «Жолқалай» жобасы - жол жабынының қалалық мониторингі жүйесі жолдардағы шұңқырларды автоматты түрде анықтай алады. Бұл ретте жүйе патрульдік қызметтер мен жедел жәрдем машиналарынан бейнетіркегіштер арқылы деректерді алатын болады. Бұл ақпарат арнайы картаға тіркеліп, коммуналдық қызметтерге нақты уақыт режимінде жолдарды бақылауға мүмкіндік туғызады.

Барлық жобалар назар аударуға тұрарлық, бірақ оларды жүзеге асыру инвестицияларды тартуға тікелей байланысты. Өз тарапымыздан біз барлық қажетті көмекті көрсетеміз. Осы орайда мен кәсіпкерлерді біздің IT-қоғамдастықпен ынтымақтастық орнатып, бірге жұмыс жасауға шақырамын. Біздің мамандар сіздердің бизнестеріңіз үшін өте сапалы технологиялық шешімдерді әзірлей алады. Сондай-ақ оларда ұзақ мерзімді іскер серіктесті қажет ететін қызықты стартап-жобалар бар.

Бүгінде Қарағанды аймағы еліміздің индустриалды ғана емес, сонымен қатар технологиялық жүрегі деп айтуға толық негіз бар.

• 29.11.2023
• 206