«Ән дария» республикалық әншілер байқауының жеңімпаздары анықталды

Ақтауда Достық үйінде өңір басшысы Нұрлан Ноғаевтың қатысуымен дәстүрлі әншілер арасында өткен үшінші республикалық «Ән дария» байқауының жеңімпаздарына марапаттар табысталды. Іс-шараға Қазақстанның әр өңірінен 30 орындаушы қатысты, деп хабарлайды Маңғыстау облысы әкімінің баспасөз қызметі.

Қазылар алқасы мүшелерінің шешімі бойынша бас жүлде, алматылық Мерлан Жамбыловқа бұйырды. Бірінші орынды біздің жерлесіміз Адай Әзімхан жеңіп алды. Екінші орынды Атыраудан Алида Қуанова мен Жасұлан Базарбаев, ал үшінші орынды БҚО-нан Нұралы Айтуған, Маңғыстаудан Әбдіғали Ибраев және Астанадан Асқар Мұқият өзара бөлісті. Сондай-ақ, қатысушыларға Қайып Қорабайұлының құрметіне арналған және ынталандыру сыйлықтары табысталды.

Кеште құрметті қонақтар қатарында ҚР еңбек сіңірген қайраткері, әнші Ерлан Рысқали, «Ән дария» ІІ бас жүлдесінің иегері Біржан Есжанов, ҚР «Мәдениет саласының үздігі», танымал орындаушы Қайрат Кәкімов, сондай-ақ ҚР мәдениет қайраткері, Қазақ ұлттық өнер университетінің «Дәстүрлі ән» кафедрасының доценті Толғанбай Сембаев болды.

Екі күнге созылған республикалық конкурстың соңғы күнінде халқымыздың мәдениетінің ажырамас бөлігі болып табылатын, ұрпақтан-ұрпаққа беріліп келе жатқан танымал дәстүрлі қазақ әндері шырқалды. Олардың қатарында «Сары бидай», «Ғалия», «Бозторғай», «Ағайша» бар.

Нұрлан Ноғаев қазақтың дәстүрлі ән өнері сан ғасыр бойы қалыптасқан халқымыздың қазынасы екенін атап өтті.

- «Біздің мақсатымыз-дәстүрлі әндерді орындауда жастардың шеберлігін дамытуға ықпал ете отырып, осы қасиетті мұраны ұрпақтан-ұрпаққа насихаттау және жеткізу. Бұл іс-шараға еліміздің түрлі мектептерінен, соның ішінде Батыс, Сыр және Жетісу, Алтай-Тарбағатай мектептерінен ән өнерінің дәстүрлерін сақтаған әншілер қатысты. Барлық жеңімпаздарды құттықтаймын!»- деп атап өтті Нұрлан Ноғаев.

• 04.12.2023
• 134