Маңғыстауда «Мен жастарға сенемін!» спектаклі сахналанды

Ақтауда өңір басшысы Нұрлан Ноғаевтың қатысуымен «Мен жастарға сенемін!» спектаклі сахналанды. Сахнада оқушылар мен колледж студенттері өнер көрсетті, деп хабарлайды Маңғыстау облысы әкімінің баспасөз қызметі. 

Спектакльдің мақсаты-жастарды Отанға қызмет етуге және тарихты құрметтеуге ынталандыру, адамгершілік құндылықтарды насихаттау, сондай-ақ Алаш қайраткерлерінің шығармашылығын және олардың тарихи мұрасының маңыздылығын көрсету.

Спектакльдің қоюшы-режиссері «JasART» жастар театрының жетекшісі Әлия Исаева, ал хореграфы Лашын Жұмахан болды. 

Нұрлан Ноғаев спектакль тек жастар үшін ғана емес, сонымен қатар маңызды тақырыптарды қозғай отырып, жалпы қоғамда қызығушылық тудыратынын атап өтті. Бұл спектакльдің әр түрлі жастағы көрермендердің жүрегіне жол тартқанын көрсетеді.

«Мемлекет басшысы Қасым-Жомарт Тоқаев жастарды қоғамның белсенді және жауапты бөлігі ретінде қалыптастырудың маңыздылығын айтқан болатын. Спектакльде қоғамға қызмет ету, жеке даму және қоршаған ортаның әсері мәселелері қозғалды, бұл барлығымыз үшін өзекті және маңызды тақырып. Бүгінгі қойылым-өнер- қоғамдық құндылықтар мен жеке тұлғаның дамуына әсер етудің күшті құралы бола алатындығының дәлелі, - деп атап өтті Нұрлан Ноғаев. 

«JasART» театры мемлекеттік грант аясында, әлеуметтік жоба өткізіп, қысқа мерзімде бірнеше маңызды әлеуметтік мәселелерге арналған спектакльдер сахналады. Бұл олардың шығармашылық әлеуетін ғана емес, сонымен қатар өзекті тақырыптарды талқылау және түсіну үшін өнер арқылы жастарды тартуға деген ұмтылысын көрсетеді.

• 05.12.2023
• 127