Ақтауда Маңғыстау облыстық «Өнер» колледжінің 30 жылдығы аталып өтті

Ақтауда Маңғыстау облыстық «Өнер» колледжінің 30 жылдық мерейтойына арналған «Өнегелі өнер ордасы» атты салтанатты іс-шара өтті, деп хабарлайды Маңғыстау облысы әкімдігінің баспасөз қызметі.

Кешке Астана қаласы әкімдігі мемлекеттік академиялық филармониясының қазақ оркестрінің жетекшісі және бас дирижері, Қазақстанның еңбек сіңірген қайраткері, профессор Айтқали Жайымов, Құрманғазы атындағы Қазақ ұлттық консерваториясының «Домбыра» кафедрасының профессоры, ҚР еңбек сіңірген қайраткері Кәрім Сахарбаев, республикалық және халықаралық конкурстардың лауреаты, «Дарын» жастар сыйлығының иегері, Құрманғазы атындағы халық аспаптары Қазақ мемлекеттік оркестрінің бас дирижері Абылай Тілепбергенов қатысты. Сонымен қатар, қонақтар қатарында ардагер ұстаздар мен мұғалімдер, колледж студенттері болды.

Облыс әкімі Нұрлан Ноғаев Маңғыстау колледждің өнер саласындағы білім беруде маңызды орнын атап өтті. Ол сондай-ақ Маңғыстау өнер колледжі ұжымының білімі мен бай тәжірибесі елімізде көптеген жылдар бойы мәдениет пен өнерді дамытуға қызмет ететініне ерекше тоқталды.

-Құрметті ардагерлер, құрметті мұғалімдер, құрметті ата-аналар мен студенттер! Бүгінгі Маңғыстау өнер колледжінің 30 жылдық мерейтойымен құттықтаймын! Осындай маңызды күні Айтқали Жайымов пен Кәрім Сахарбаев сияқты көрнекті сала ардагерлерін еске алатын ерекше сәт. Осы оқу орнының негізін қалаған Сержан Шәкір, Аманбек Сүндетов, Айтберген Жаңбыршы, Роза Айдарбаева, Хадиша Балапашқызы, Людмила Вялшина, Құлбай Айтбаев, Нұрша Құбалиева, Рахат Мадреев және Сарқыт Мадреев сияқты ардагер мұғалімдерді ерекше атап өткім келеді. Осы 30 жыл ішінде колледж музыкалық білім алған мыңнан астам түлектер бітірді. Олардың көпшілігі Құрманғазы атындағы Қазақ ұлттық консерваториясы, Қазақ ұлттық өнер университеті, Темірбек Жүргенов атындағы Ұлттық Өнер академиясы сияқты беделді оқу орындарында білімдерін жалғастырды. Ұжым бүгінде қазақ өнерінің дамуына белсенді үлес қосып жүрген талантты оқушылармен мақтанады,
- деп атап өтті өңір басшысы Нұрлан Ноғаев.

Айта кетейік, түлектердің 10-15 пайызы өз бизнесін ашып, облыс тұрғындарын жұмыспен қамтыған. Атап айтқанда, Серік Сариев «Жорға» би ансамблін, Зина Байрамова - «Шадвал» би ансамблін, Әлібек Мұратов пен Кенжебек Аяғанов - «Жеті саз» өнер студиясын, Бақытжан Құлбаев – «Әлем арт» көркемсурет галереясын, Тынышбек Балтабаев - «Арт өнер» көркем галереясын, Эльмира Сланова - «Сазген» шығармашылық орталығын ашқан. Сонымен қатар, Ержан Шағыров «Арт вокал» балалар шығармашылық орталығының, Марта Құталиева – «Марта Арт» көркемсурет студиясының , Гүлнар Жолдасбаева - «GJ», Гүлжан Өтепова - «Art-life» шығармашылық орталықтарының негізін қалаған.

Техникалық және кәсіптік орта білімнен кейінгі білім беру ұйымдарының педагогтері арасында өткен ІІ-ІІІ республикалық кәсіптік шеберлік конкурсына Маңғыстау мәдениет және өнер колледжінің педагогтары қатысып, жеңімпаз атанды.

Салтанатты шарада колледж ардагерлері мен педагогтары өңірдің әлеуметтік-экономикалық дамуына қосқан елеулі үлесі үшін марапатталып, аймақ басшысынан алғыс хаттар алды. Бұдан басқа, Маңғыстау облыстық «Өнер» колледжінің осы 30 жылдық білім беру жолындағы жеткен жетістіктері үшін мерейтой қарсаңында төсбелгілер тақты.

• 14.12.2023
• 186