Астанада «Қазақстандық бизнес орнықты даму үшін» тақырыбында кәсіпкерлермен кездесу өтті

Іс-шараға ҚР Ұлттық экономика вице-министрі Абзал Әбдікәрімов, Қазақстандағы БҰҰ Тұрақты үйлестірушісі Микаэла Фриберг-Стори, БҰҰДБ-ның Қазақстандағы Тұрақты өкілі Катаржина Вавьерниа, БҰҰ Жаһандық шартының Қазақстан бойынша менеджері Динара Сейджапарова және БҰҰ Жаһандық шартының мүшелері - бизнес-қоғамдастық өкілдері қатысты.

Кездесуге қатысушылар Қазақстанның Орнықты даму мақсаттарына қол жеткізу жөніндегі прогресін, сондай-ақ бизнесті жүргізу және орнықты даму жөніндегі бастамаларды талқылады.

Өз сөзінде А.Әбдікәрімов ұлттық және өңірлік деңгейлерде ОДМ-ды ілгерілету, ОДМ ұлттық индикаторларын мемлекеттік жоспарлау жүйесінің құжаттарына имплементациялау бойынша Үкіметтің жүргізіп жатқан жұмысы туралы баяндады.

БҰҰ Жаһандық шартына қосылу рәсімінен өткен бизнес-қоғамдастық өкілдері компаниялардың соңғы жылдары қол жеткізген нәтижелері туралы айтты. Сонымен қатар, олар Қазақстанда бизнесті орнықты жүргізудің тиімді тәжірибелерімен бөлісті.

Вице-министрдің айтуынша, Қазақстан үшін жаһандық шарттың әсері – бұл компаниялардағы әлеуметтік-жауапты саясатты дамыту және неғұрлым инклюзивті әрі орнықты экономика құру.

БҰҰ-ның жаһандық шарты – бұл 2000 жылы Біріккен Ұлттар Ұйымының бүкіл әлемдегі кәсіпорындар мен ұйымдарды орнықты және әлеуметтік жауапты саясат пен тәжірибені қабылдап ынталандыруға бағытталған ерікті бастама. Құжат төрт негізгі саланы қамтитын жалпы қабылданған он қағида негізінде жұмыс істейді: адам құқықтары, еңбек, қоршаған орта және сыбайлас жемқорлыққа қарсы күрес.

• 15.12.2023
• 212