Бейнебақылау камераларының көмегімен Қазақстан колонияларында 7 мыңнан астам заң бұзушылық пен суицид жасаудың 65 жағдайының жолы кесілді

Қазақстанның қазіргі даму кезеңінде Қылмыстық-атқару жүйесі бөлімшелерінің бас бостандығынан айыру орындарында ұсталатын адамдарды қадағалауды қамтамасыз ету бойынша қызметі де жетілдірілуде.

ҚАЖ мекемелеріндегі соңғы жылдардағы төтенше оқиғаларды талдау колонияларды қадағалауды қамтамасыз етуді ұйымдастыруда кемшіліктердің бар екенін көрсетті.

Мекемелерді де, ҚАЖ жеке құрамын да техникалық жарақтандыруды жетілдіру және дамыту бойынша қабылданып жатқан шаралар шеңберінде 2015 жылдан бастап бейнебақылау және алып жүретін бейнетіркеу жүйелерін енгізу бойынша жұмыстар белсенді жүргізілуде. Ең алдымен, бұл шаралар мекемелердегі қызмет көрсететін адамдардың қауіпсіздігін қамтамасыз етуге, ұсталушылар тарапынан да, қызметкерлер тарапынан да құқыққа қайшы әрекеттерді жасауға жол бермеуге және олардың қызметтік міндеттерін орындауына бағытталған.

2015 жылы ҚАЖ мекемелерінде 7 мыңға жуық бейнебақылау камералары жұмыс істеді, қазіргі уақытта олардың саны 14 мыңға жетті, ал дербес бейнетіркегіштердің саны 6 есеге өсті.

Алайда, бүгінде колониялардың аудио және бейнетіркегіш құралдарымен техникалық жарақтандырылуы бас бостандығынан айыру түріндегі жазаларды орындаудың қойылған міндеттерін толық көлемде шешуге мүмкіндік бермейді. Дегенмен, олардың көмегімен 2020 жылдың өзінде жазаны өтеудің белгіленген тәртібінен жалтарған күдіктілер, айыпталушылар және сотталғандар тарапынан 7 мыңнан астам бұзушылық тіркелді.

Бейнебақылау камералары мен тасымалды бейнетіркегіштерден алынған жазбалар ішкі тәртіптеме қағидаларын бұзу туралы актілерді жасау кезінде аудиовизуалды дәлел ретінде қызмет етеді.

Бұдан басқа, ҚАЖ мекемелерінде ұсталатын адамдардың заңсыз іс - әрекеттерін бейнебақылау камералары арқылы уақтылы анықтау салдарынан 2016 жылдан бастап 65 суицидтің жолы кесілді, оның ішінде 2020 жылы-6.

Тиімділікті арттыру жұмыстары тоқтамайды. Мемлекет Басшысының Жолдауын орындау назарға алынды, оған сәйкес Республиканың ҚАЖ мекемелерінде жаппай бейнебақылау жүргізу жоспарлануда. Сонымен қатар, қазіргі уақытта айыпталушылар мен және сотталғандармен жұмыс істейтін қызметкерлерді жабдықтау үшін алып жүретін бейнетіркегіштердің тиесілік нормасын кеңейту мәселесі пысықталуда, оларға жасақ бастықтары, жедел, режим қызметі қызметкерлері және басқалар жатады.

• 27.01.2021
• 529