Тұрғындар өтініші: Абай ауданында қоғамдық көлік жаңартылуда

Абай ауданында Халықпен кездесуінен кейін автобус паркі жаңартылып, басқа да мәселелер шешілуде. 

Барлығы 44 сұрақ пен ұсыныс айтылды, олардың 26-сы бойынша тұрғындар көмек алды. Қалғандары бақылауға алынып, олармен жұмыс жасалып жатыр.

Тұрғындардың өтініші бойынша ауданда автобус паркі жаңартылуда. Жеке тасымалдаушы аудандық және ауылдық бағыттарға қызмет көрсететін сегіз автобус сатып алды.

Қарабас кентінде сумен жабдықтау мәселесі шешілді. Қосымша сорғы орнатылды, тұрғындардың үйлерінде сумен жабдықтау тұрақтандырылды.С. Сейфуллин көшесі, 30, ұзындығы 282 метр 14-ші мектептің жаяу жүргіншілер өткеліне дейін тротуар салынды.

Юбилейный ауылы тұрғындарының көптеген өтініштері бойынша елді мекенде жаңа фельдшерлік-акушерлік пункт салынды. Нысан жұмыс істеп тұр.

Топар ауылында инватакси іске қосылды. Әлеуметтік жобаны "Ауыл Аманаты" бағдарламасы бойынша несие алып, жергілікті кәсіпкер іске қосты.

Ақбастау ауылының тұрғынына "Сарыарқа" ӘКК арқылы 10 бас аналық жылқы басын сатып алуға несие алуға көмек көрсетілді.

Тұрғындардың ескертулері мен ұсыныстарын орындау бойынша жұмыс жалғасатын болады. 

Биыл абайлықтармен екі рет кездестім.

• 29.12.2023
• 216