Маңғыстауда Адай жылқысы ресми мәртебеге ие болды

Маңғыстауда асыл тұқымды Адай жылқысы арнайы патентке ие болып, ресми мәртебе берілді, деп хабарлайды Қоғамдық коммуникация орталығы.

Маңғыстау облысының ауыл шаруашылығы басқармасының басшысы Қазбек Ташимовтың айтуынша, мәртебені ұсыну мақсатында арнайы мемлекеттік комиссия құрылды. Соған байланысты, мемлекеттік инспекция комитетінің бұйрығымен құрылған комиссия аймақтың барлық аудандарын аралады.

- Онымен қоса, 1400-ге жуық Адай жылқысының дерек-мәліметтері жинақталды. Қазақ мал шаруашылығы және жемшөп өндіру ғылыми-зерттеу институты заманауи технологияларды пайдалана отырып, жылқылардың генетикалық құрылымын ғылыми сынақтан өткізді. Содан соң, мемлекеттік комиссия адай жылқысының тұқымы туралы патентті бекіту және алу үшін арнайы іс-шара ұйымдастырды. Аталған акт ҚР Ауыл шаруашылығы министрлігіне және ҚР Әділет министрлігіне жолданды. Сондай-ақ, асыл тұқымды жылқыларға мәртебені беру шеңберінде бірнеше шаралар ұйымдастырылды. Сонымен қатар, мемлекеттік комиссия өкілдерімен кездескен өңір басшысы Нұрлан Ноғаев ауыл шаруашылығының дамуы мен өркендеуінің маңыздылығын атап өтіп, Адай жылқысына мемлекеттік мәртебе беру өңір дамуына жаңа өзгерістер беретінін атап өтті ,- деді Қазбек Ташимов.

Айта кетейік, бұл іс-шаралардың барлығы Президент тапсырмаларының шеңберінде қолға алынып келеді. Президент Қасым-Жомарт Тоқаевтың тапсырмасы бойынша Адай жылқысына дербес жылқы тұқымы мәртебесін беру үшін ауқымды жұмыстар атқарылған.

• 29.12.2023
• 254