«ҚОШҚАР АТА» ҚАЛДЫҚ ҚОЙМАСЫН ЗАЛАЛСЫЗДАНДЫРУ ЖҰМЫСТАРЫНЫҢ I КЕЗЕҢІ НАУРЫЗ АЙЫНДА БАСТАЛАДЫ

Бүгін Қошқар Ата қалдық қоймасын қалпына келтіру процесін жандандыру туралы мәселеге нүкте қойылды. Жұмыстар осы жылдың наурыз айында басталады деп күтілуде. Бұл туралы экология министрі Мағзұм Мырзағалиевтің Маңғыстау облысына жасаған сапары кезінде белгілі болды.
Маңғыстау облысы әкімінің орынбасары Бақытжан Қашақовтың қатысуымен өткен көшпелі кеңес барысында министрге қалпына келтіру бойынша жұмыс жоспары ұсынылды. Министр радиоактивті әрі улы көл мәселесін шешуді кешіктірілмеу керек екенін және процесті жақын арада бастау керектігін айтты. Себебі «Қошқар Ата» жақын маңдағы елді мекендердің тұрғындары үшін айтарлықтай зиян келтіреді.
Мамандардың айтуынша, қалпына келтіру процесі шамамен 3 жылға созылады. Бүгінгі күні Қошқар Ата қалдық қоймасының айналасында жасыл қорғаныш аймағын құру бойынша жұмыс жүргізілуде. 2015 жылдан 2020 жылға дейін 239 мыңға жуық сексеуіл көшеттері отырғызылды. Бұл жұмыстар улы көлдің жағалауы жасыл желектермен толық қоршалғанға дейін жалғаспақ. Қосымша тағы 40 га көшет отырғызуға конкурс жарияланды.
Естеріңізге сала кетсек, қалпына келтіру жұмыстарын жүргізуге конкурс 2019 жылдың желтоқсан айында жарияланған болатын. Сол кезде Мемлекеттік сатып алу бойынша конкурсты өткізудің заңдылығына қатысты мәселе туындады. Сот процесінен кейін Жоғарғы Сот алқасының қаулысымен берілген кассациялық шағымдар қанағаттандырылды. Енді бұл жұмыстарды атқаруға «Павлодарский речной порт» АҚ жұмысқа кіріседі. Қошқар Ата қалдық қоймасы Каспий теңізінен 7-8 шақырым және Ақтаудан 3-4 шақырым қашықтықта орналасқан. Жалпы ауданы 77 км2, қалдықтардың ауданы 66 км2 құрайды.

Маңғыстау облысы әкімінің баспасөз қызметі

• 29.01.2021
• 214