АҚТАУДА АВТОРДЫҢ ҚАТЫСУЫМЕН “ҚҰНАНБАЙ МЕН АБАЙ” ПЬЕСАСЫ САХНАЛАНДЫ

Маңғыстау облыстық Н.Жантөрин атындағы музыкалық драма театрында
ҚР Мемлекеттік сыйлығының иегері Есенғали Раушановтың ұлы Абайдың 175 жылдық мерейтойына арнайы жазған «Құнанбай мен Абай» пьесасы сахналанды. Театрланған қойылымды тамашалауға өңір басшысы Серікбай Трұмов, шығарма авторы ақын, жазушы Есенғали Раушанов келді. Облыс әкімі қойылымнан алған әсерімен бөлісіп, театрдың шығармашылық ұжымына алғысын жеткізді.
«Былтыр мемлекет басшысы Қасым-Жомарт Кемелұлы өзі бастап, ұлы Абайдың 175 жылдығы елімізде кең көлемде аталып өтті. Біздің облысымызда да ақынның шығармашылы жоғары деңгейде насихатталды. Бүгінгі Есенғали Әбдіжаппарұлы жазған қойылымы хәкім Абайдың мерейтойына ерекше сый болды. Қойылымда Абай ілімінің маңызы мен әке мен бала арасындағы рухани жақындықтың шынайы үлгісін көрдік. Міне, осындай туындыны дүниеге әкелген Есенғали Раушановқа Маңғыстау жұртшылығы атынан зор құрметпен алғыс айтамын»,-деді С.Трұмов.

Көрерменге жол тартқан шығармада ел иесі Құнанбай мен сөз иесі Абай арасындағы бұл дүниеде ашылмаған қарым-қатынастың қатпарлары ашылып, айтылмаған сырлары айтылады. Әке мен баланың екеуара бүкпесіз, ащы да болса ақиқат әңгімелері арқылы кеңестік идеология үстемдігі кезінде Құнанбайға даланың кертартпа шонжары, ел басындағы бақытсыздықтың құнекері деген қарғыс таңбасын көрерменді иландыра отырып алып тастайды. Ақын, дана Абай басындағы барлық асыл қасиеттердің балаға әке кіндігінен, текпен беріліп, тәрбие арқылы сүйекке сіңіп, дамитынын меңзейді. Көрермен Абай өлеңдері мен әндерінің, қара сөзерінің сахнада керемет үйлесіммен орындалуы арқылы әкеге қонбай кеткен өлең мен өнердің бала бойында қалай бағы жанып, бала Абайдың дана Абайға, ұлт ұстазына айналғанына куә болады.

Маңғыстау облысы әкімінің баспасөз қызметі

• 29.01.2021
• 262