Ұлттық экономика вице-министрі Бауыржан Құдайбергенов жұмыс сапарымен Абай облысына барды

Өңірге жұмыс сапары барысында вице-министр Семей қаласындағы «СемАЗ» ЖШС автомобиль және ауыл шаруашылығы техникасын шығаратын зауыттың қызметімен танысты. Кәсіпорынның жылдық өндірістік қуаты 1200 автобусты, 10 000 жүк көлігін және 3500 тракторды құрайды. Қазір мұнда 400-ге жуық адам жұмыс істейді, алдағы уақытта жұмыс орындарын ұлғайту жоспарлануда.

Содан кейін Б.Құдайбергенов 1964 жылы пайдалануға берілген №11 орта мектепте болды. Ол соңғы рет 2011 жылы реконструкцияланған. Білім беру мекемесі апатты жағдайда болғандықтан, жаңа ғимарат салудың қажеттігі туындауда.

Вице-министр барған келесі нысан «Теплокоммунэнерго» МКК-нің екі қазандығы болды. Семейдің оң жағалауындағы жылу көздерінің қуатын арттыру қажеттілігі туралы бұрын бірнеше мәрте айтылған. Алайда, мердігердің кінәсінен жобалар әлі күнге дейін жүзеге асырылмаған.

Жылу энергиясының тапшылығын шешу үшін «35 квартал» қазандығына қуаты 20 Гкал/сағ. құрайтын және «Зооветинститут» қазандығына 14 Гкал/сағ. болатын қосымша тағы бір қазандық орнату жоспарлануда. Оларды іске асыруға шамамен 8 млрд. теңге қажет.

Бесқарағай ауылында вице-министр жергілікті тұрғындармен кездесу өткізді. Атап айтқанда, кездесуде әлеуметтік нысандарды жөндеуге және жол құрылысына қатысты мәселелер көтерілді. Б.Құдайбергенов азаматтар айтқан барлық мәселелер мен ұсыныстар міндетті түрде қарастырылатынын атап өтті.

Сондай-ақ, вице-министр «Ауыл – Ел бесігі» бағдарламасы аясында жүзеге асырылған жобалардың сапасын бағалады. Ол Бесқарағай ауылындағы пайдалануға берілген балабақшаға барды. Жобаның құны 96 млн. теңге.

Биыл «Ауыл – Ел бесігі» бағдарламасы бойынша облыстың 42 ауылында 76 жобаны іске асыруға 8,5 млрд.теңге бөлінді. Ал, келер жылы құны 7,8 млрд.теңге болатын 101 жобаны іске асыру жоспарлануда.

• 22.01.2024
• 185