АҚТАУ ҚАЛАСЫНЫҢ ӘКІМІ Н. ҚИЛЫБАЙ: "ЕКІ ҚОЛҒА БІР КҮРЕК ТАПҚАНҒА ЖҰМЫС БАР"

 Ақтау қаласының әкімі Нұрдәулет Қилыбайдың тұрғындар алдында есеп беру кездесуі онлайн өтті. Алдымен, шаһар басшысы қаланың әлеуметтік-экономикалық дамуына тоқталып, атқарылған жұмыстарды баяндады. 2020 жылы барлық макрокөрсеткіштер бойынша оң динамика байқалады. Оның ішінде құрылыс, өңдеу өнеркәсібінің көлемі жоғары. Халық саны – 203 536 адамға жетті. Ол облыс бойынша (717 518) халық санының 28,4%-ын құрайды.

Былтыр тындырылған шаруа аз емес. Қала әкімі бірқатар атқарылған сан алуан жұмыстың басты көрсеткіші - халыққа ең қажеттісі шағынаудандарды абаттандыру жұмыстары мен қоғамдық көліктердің жаңарғанын атап өтті.

"6 шағынауданға (2,6,7,12,26,27) толығымен абаттандыру жұмыстары жүргізілді (автожолдар – 67,2 км., тротуар - 45,8 км. балалар ойын алаңдары – 63 дана, спорт алаңдары – 22 дана). 15 шағын ауданындағы тұрғын үйлердің аула аумағын абаттандыру жұмыстары өтпелі болып, жалғасуда. Өздеріңізге белгілі, 18 жаңа автобус сатып алынып, №3, №8 бағыттары бойынша қосылды. Сонымен қатар, кейін 30 жаңа автобус әкелініп, №5, №107 маршуттарына жіберілді. Бастысы, халық қуанып жатыр", - деді Нұрдәулет Қилыбай.

Жиында қала тұрғындарынан 70-ке жуық сұрақ келіп түсті. Олардың басым бөлігі баспанамен қамту, шағынаудан ішін абаттандыру мен инженерлік желімен қамтамасыз ету, азық-түлік бағасын тұрақтандыру, көшелерді жарықтандыруға қатысты болды. Қала әкімі аталған сұрақтарға жауап беріп, әр мәселені өз бақылауына алатынын айтып өтті.

Тұрғындардың бірі жұмыссыз жастардың мәселесіне байланысты сауалын жолдады. Қала әкімі жастар жұмыстың ауыр не жеңіліне қарамай, тынымсыз еңбек ету керектігін айтты.

"Диірменде өскен тышқан күннің күркірегінен қорықпайды", деген сөз бар. Тағдырдың әр түрлі кезеңдерінде жастар мынау ауыр, мынау жұмысшы деп таңдамау қажет. Жұмыс бар, қазір екі қолға бір күрек ұстағанға табылады. Өзім де қара жұмыстан бастадым", - деді Нұрдәулет Қилыбай.

Жиын соңында облыс әкімінің орынбасары Г. Қалмұратова қала әкіміне бірқатар тапсырмаларды жүктеді. Оның ішінде инвестиция тарту арқылы жаңа жұмыс орындарын ашу, макрокөрсеткіштерді тұрақты ұстау, жастарды қолдау, жұмыссыздық деңгейін азайту, көшені жарықтандыру, көгалдандыру жұмыстарын қадағалауды бақылауда ұстау керектігін айтты.

• 03.02.2021
• 206