Қазақстан мен АҚШ өнеркәсіп пен геология салаларындағы ынтымақтастықты нығайтпақ: министр Шарлапаевтың жұмыс сапары

Екіжақты қарым-қатынастарды нығайту және халықаралық аренада қазақстандық мүдделерді ілгерілету стратегиясы аясында ҚР Өнеркәсіп және құрылыс министрі Қанат Шарлапаев Америка Құрама Штаттарына жұмыс сапарымен барды.

Сапар барысында министр Шарлапаев америкалық саясат пен бизнестің маңызды тұлғаларымен келіссөздер жүргізеді. Кездесулер барысында геология және тау-кен өнеркәсібі саласындағы ынтымақтастықты тереңдету мүмкіндіктерін талқылауға, сондай-ақ энергетика және қоршаған ортаны қорғау саласындағы перспективалық жобаларды қарастыруға ерекше назар аударылады.

Министр АҚШ-тың жетекші компанияларының өкілдерімен, соның ішінде DFC бас директорының орынбасары Ниша Бисволлмен, USKZBC, U.S. Geological Survey мүшелерімен болашақ ынтымақтастық мен Қазақстан экономикасына инвестиция құю әлеуетін талқылау үшін кездеседі.

Екіжақты кездесулер барысында маңызды пайдалы қазбалар саласындағы ынтымақтастық мәселелері талқыланады деп күтілуде.

Қазақстан АҚШ-қа осы саладағы стратегиялық ынтымақтастықты, оның ішінде алюминий, скандий және галлийді жеткізуді ұсынады. Біздің еліміз басқа құзыреттердің қатарында вольфрам, кобальт, литий, титан және басқа да бағалы пайдалы қазбаларды барлау және өндіру бойынша қолданыстағы қуаттарды және перспективалық жобаларды пайдалана отырып, толлингтік қызметтерді ұсынады. Қазақстандық тараптың айтуынша, осы стратегиялық маңызды салаға инвестиция көлемін, ұзақ мерзімді келісім-шарттарды және инвестицияны қолдау мәселелерін талқылау жоспарлануда.

Айта кетерлігі, Қазақстан АҚШ тізіміндегі 50 маңызды минералдың 17-уін өндіріп, өңдейді. Бүгінгі таңда екі ел арасында титан, берилий, тантал және ниобийді жеткізу бойынша ынтымақтастық сәтті жолға қойылған. Қазақстандық бериллий мен тантал өнімдерін американдық Transport Technologies LLC, IBC US Holdings Inc. және Tosoh SMD Inc. тұтынуда.

Сапар Қазақстанның халықаралық деңгейдегі келіссөздерге ашық екендігін және елдің өнеркәсіп пен геологиялық барлау саласындағы ортақ мақсаттарға қол жеткізу үшін халықаралық қоғамдастықпен белсенді әрекеттесуге дайын екендігін көрсетеді.

Бұл сапар Қазақстан мен АҚШ арасындағы мемлекетаралық және салааралық байланысты нығайтуға, ынтымақтастықтың жаңа мүмкіншіліктерін ашуға және өзара тиімді серіктестікті қамтамасыз етуге бағытталған.

• 05.03.2024
• 161