Декарбонизация процесі экономиканың барлық салаларына әсер етеді, - Т.Жақсылықов

Астанада «Қазақстандағы көміртекті реттеу үшін климаттық заңнаманы жетілдіру» ЭЫДҰ SIPA жобасының қолдауымен «Жасыл Академия» ғылыми-білім беру орталығының сараптамалық семинары өтті. Шараға Ұлттық экономика бірінші вице-министрі Тимур Жақсылықов қатысты.

Кездесу ашық пікірталас форматында өтті. Қатысушылар COP-28 ұсынымдары аясында Қазақстанда көміртекті реттеуді жетілдіру үшін климаттық заңнаманың бағыттарын талқылады.

Өз сөзінде Тимур Жақсылықов 2060 жылға дейін көміртегі бейтараптығына қол жеткізу стратегиясын іске асыру жөніндегі Жол картасын әзірлеудің бағыттарын айтты.

Оның айтуынша, Жол картасын әзірлеу кезінде еліміздің ерекшелігін ескере отырып, Қазақстан үшін бірегей энергетикалық көшу моделін қалыптастыру қажет болады.

«Декарбонизация экономиканың барлық салаларына, әсіресе энергетика, өнеркәсіп, ауыл шаруашылығы және қалдықтарды басқаруға әсер етеді. Сондықтан жол картасында төмен көміртекті саясатты кешенді түрде жүзеге асыру және секторлық, кросс-секторлық әрі өтпелі тәсілдерді қолдану жөніндегі іс-шаралар қамтылуы тиіс», - деп атап өтті Т. Жақсылықов.

Бүгінде осы мақсатта Ұлттық экономика министрлігі жанынан арнайы жұмыс тобы құрылды. Оның құрамына салалық министрліктер, ведомстволар, ұлттық компаниялар, сондай-ақ бизнес-қоғамдастық өкілдері, ғылыми және зерттеу ұйымдары, Дүниежүзілік Банк, БҰҰДБ (Біріккен Ұлттар Ұйымының Даму бағдарламасы), ЕҚДБ (Еуропа қайта құру және даму банкі), АДБ (Азия даму банкі), SIPA, GIZ және т. б. енді.

• 05.03.2024
• 232