Нұрлан Ноғаев мемлекеттік органдарға 2024 жылға арналған бюджеттің уақытылы орындалуын қамтамасыз етуді тапсырды

2024 жылы 5 наурызда өңір басшысы Нұрлан Ноғаевтың төрағалығымен бюджет шығыстарының тиімділігін арттыру мәселесі талқыланған аппарат отырысы өтті, деп хабарлайды Маңғыстау облысы әкімінің баспасөз қызметі.

“2024 жылы Маңғыстау облысының бюджеттегі кірісі 308 млрд теңге деңгейінде болады деген болжам бар,  бұл 2023 жылмен салыстырғанда 16% артық”,- деп атап өтті қаржы басқармасының басшысы Светлана Нарешова.

Оның айтуынша, бюджет қаражатын тиімді жұмсау осы саладағы басқару мен әкімшілендірудің сапасына тікелей байланысты. 

Қаржы бөлімінің басшысы атап өткендей, бюджет қаражатын игерудегі елеулі мәселенің бірі -  мемлекеттік сатып алу арқылы өткен конкурстар бойынша атқарылған жұмыстардың актісі мен төлем құжаттарын кеш тапсыру, қосымша келісім жасау мерзімдерінің ұзақтығы, сондай-ақ  мемлекеттік сатып алу рәсімдерінің көпке созылуы болып отыр.

«Сонымен қатар, жосықсыз мердігерлердің мәселесі де бар, бұндай жағдайда соттасу болады, соның салдарынан әлеуметтік маңызы бар жобалар кейінге қалады, бұл өз кезегінде өңірдің дамуын тежейді”,- деді Светлана Нарешова.

Нұрлан Ноғаев мемлекеттік органдарға 2024 жылға арналған бюджеттің уақтылы және тиімді орындалуын қамтамасыз етуді тапсырды. Бұл өңірлік деңгейде алға қойылған барлық міндеттерді орындауға мүмкіндік береді, сондай-ақ азаматтардың әл-ауқатын жақсартады.

“Бюджеттің сапалы атқарылуын тұрақты түрде бақылап отыру керек. Бюджет қаражатын жұмсауға қатысты жоспардың кестесін бұзбай, бақылап отыру керек», – деді аймақ басшысы.

• 06.03.2024
• 234