Қарағанды облысында су тасқыны қаупі бар аудандарды тексеру басталды

ТЖД-мен бірлесіп облыстың су тасқыны қауіпі бар жерлерін аралауды бастадық. Бүгінгі таңда аймақтың 95 %-да қар жатыр. Барлық өзендер мен су қоймалары қысқы режимде. Бірақ осыған қарамастан біз су өткізетін құбырлар мен елді-мекендердің аумақтарын қардан тазарту жұмыстарын  бастадық, қажетті инертті материал да дайындалып жатыр.  

Бүгін Бұқар жырау ауданының Ғабиден Мұстафин кенті, Садовое және Чкалово ауылдарын, сондай – ақ Ақтау кентіндегі Мырза станциясында болдық. Өзен арналарының бойында орналасқан елді-мекендердің жанындағы қорғаныш біліктері мен габиондардың жағдайына ерекше назар аударылады. Осы аптаның соңына дейін автожолдардың барлық учаскелеріндегі су өткізу құбырлары, көпірлер тазаланады.  

Сондай-ақ, Нұра өзенінің арнасын Ертіс – Қарағанды каналынан Қарағанды-Павлодар тас жолындағы автожол көпіріне дейін тексердім. Өткен жылы мұнда 2,4 км құрайтын өзен бойын санациялау, тазарту, тереңдету және арнаны кеңейту жұмыстары жасалды. Өзеннің ені 20 метрден 100-ге дейін үлкейтілді.  

Жұмыс сапары барысында Ғабиден Мұстафин кентіндегі көпірді қайта құру барысын тексердім. Ол облыстық маңызы бар Қарағанды – Теміртау – Токаревка автожолында орналасқан. Бұл көпірді жөндеуді тұрғындар көптен бері сұраған болатын. Бүгін мұнда тікелей жол жоқ. Жаңа автомобиль көпірі жақын маңдағы елді-мекендерді байланыстырады. Жоспар бойынша құрылысты биыл аяқтау жоспарлануда.

Қабылданып жатқан шараларға қарамастан, тұрғындар мен кәсіпкерлердің көмегі мен қолдауы да аса маңызды, олар өз аумақтарынан қар шығарумен белсенді айналысуы қажет.

• 15.03.2024
• 249