Атырауда республикалық жас әйелдердің бизнес-форумы өтті

Іс-шара еліміздегі әйелдер кәсіпкерлігін дамытудың негізгі мәселелерін талқылауға арналған алаңға айналды. Оған Қазақстанның барлық өңірінен 300-ден астам кәсіпкер әйел қатысты.

ҚР ҰЭМ Кәсіпкерлікті мемлекеттік қолдау және қорғау департаментінің директоры Нұрбол Жаңабеков өз сөзінде ШОБ секторындағы кәсіпорындардың 49%-ын бүгінде әйелдер басқаратынын атап өтті. Тек Атырау облысында жұмыс істеп тұрған 65 мың кәсіпкерлік субъектінің 37 мыңын әйелдер басқарады. Сондай-ақ, әйелдер қауымы өкілдерімен 1 млн 400 мыңға жуық жұмыс орны қамтамасыз етілді.

«Пайыздық мөлшерлемені субсидиялау және несиеге кепілдік беру сияқты қаржылық қолдау құралдары әйелдер бизнесінің өсуіне ықпал ете отырып, табысты жұмысын жалғастыруда. Өткен жылы осы шаралардың арқасында тиісінше 6 мыңнан астам жобаға және 3,5 мың кәсіпкер әйелге қолдау көрсетілді. Бұл барлық қолдау көрсетілетін жобалардың шамамен 50% құрайды», - деді департамент директоры.

Бұған қоса, форум барысында қаржылық емес қолдау шараларына ерекше назар аударылды. Олардың маңыздылығына «Бизнестегі әйелдер» жобасы және кәсіпкерлердің кәсіби құзыреттілігі мен бәсекеге қабілеттілігін арттыруға бағытталған басқа да бағдарламалардың сәтті жүзеге асырылуы дәлел.

Шара бағдарламасы аясында жас кәсіпкерлер жәрмеңкесі, кәсіпкерлік дағдыларды дамыту бойынша тренингтер мен шеберлік сыныптары өтті.

Сонымен қатар форумнан тыс Нұрбол Жаңабеков кәсіпкерлермен жеке кездесулер өткізді. Ол кәсіпкерлікті мемлекеттік қолдау шаралары, заңнамадағы өзгерістерге қатысты сұрақтарға жауап берді. Қатысушылар тарапынан айтылған барлық ұсыныстар әрі қарай қарастырылып, зерделенетінін жеткізді.

• 28.03.2024
• 139