Энергетика вице-министрі Ә.Жамауов Ақмола облысының тұрғындарымен кездесті

Қазақстанның энергетика вице-министрі Әлібек Жамауов жұма күні Ақмола облысы тұрғындарының алдында есеп беру кездесуін өткізіп, оның барысында ҚР Энергетика министрлігінің электр станцияларын жаңғырту, газбен қамтамасыз ету бойынша жүргізіліп жатқан жұмыстары туралы айтып, тұрғындардың сұрақтарына жауап берді.

Қазіргі уақытта Ақмола облысында негізгі энергия көзі Степногорск ЖЭО болып табылады, оның орнатылған электр қуаты 180 МВт құрайды.

Вице-министрдің айтуынша Көкшетау қаласында жылу энергиясына қосымша қажеттілік туындап отыр, оны жабу үшін қазіргі таңда Көкшетау ЖЭО салу қарастырылуда.

2024 жылы республикалық бюджет есебінен 942 млн. теңгені құрайтын 2 жоба жүзеге асырылуда, оның ішінде:

- энергетикалық объектілерді жаңғыртуды аяқтауға – 228,7 млн.теңге (2023 жылы 600,0 млн. теңге бөлініп, игерілді);

- Атбасар қ. орталық қазандықты реконструкциялауды бастауға – 713,5 млн теңге.

Бұдан басқа Ақмола облысында жалпы қуаты 541,35 МВт жаңартылатын энергия көздерінің 19 объектісі жұмыс істейді, оның ішінде қуаты 441,35 МВт 18 жел электр станциясы және 100 МВт 1 күн электр станциясы. Жалпы қуаты шамамен 4,95 МВт болатын жаңартылатын энергия көздерінің 1 объектісін іске қосу қосымша жоспарлануда.

Тағы бір маңызды бағыт ауыл шаруашылығы тауарын өндірушілерді көктемгі дала жұмыстарына дизель отынымен қамтамасыз ету мәселесі болып табылады.

Еліміздің ауыл шаруашылығы тауарын өндірушілеріне 250 мың теңге/тоннаға 340,3 мың тоннадан астам дизельдік отын бекітілді. Ақмола облысында АШТӨ-ге 82,6 мың тонна дизель отыны қарастырылған, қазіргі уақытта 12 мың тонна немесе жалпы көлемнің 14,5 %-ы  тиеп-жөнелтілді.

Әлібек Жамауов Ақмола облысын газдандыру мәселесіне де тоқталып өтті.

Нұсқалардың бірі – «Сарыарқа» магистральдық газ құбырының 2,3 кезегінің құрылысы. Бұл жобаны іске асыру үшін «Бейнеу-Бозой-Шымкент» және «Сарыарқа» газ құбырларының қуатын арттыру талап етіледі, өйткені орталық өңірлердің көгілдір отынға деген қажеттілік артуда.

Вице-министр осы мақсатта «Сарыарқа» МГ 4-кезеңі мен «Бейнеу-Бозой-Шымкент» МГ 2-ші желі құрылысының техникалық-экономикалық негіздемесі әзірленіп жатқанын атап өтті.

Сонымен қатар Ресей Федерациясынан газдандыру мәселесі, қуаты 40 млрд м3/жыл «Ресей Федерациясы – Қазақстан Республикасы – Қытай Халық Республикасы» газ құбырын салу мәселесін пысықтау шеңберінде «Газпром» ЖАҚ-пен бірлесіп зерттелуде.

Бүгінгі таңда солтүстік-шығыс аймақтарды газдандыру перспективасы бар транзиттік газ құбырын салу шарттарын талқылау бойынша келіссөздер үдерісі басталды.

Барлық бастапқы деректерді алғаннан кейін газдандырудың оңтайлы нұсқасы әзірленеді.

Есеп беру кездесуінен кейін вице-министрдің азаматтарды жеке қабылдауы өтті.

• 29.03.2024
• 141