Энергетика вице-министрі Б. Ілияс Chapter Zero Kazakhstan бастамасының ашылуына қатысты

2024 жылғы 28 наурызында Астана қаласында Chapter Zero Kazakhstan бастамасының ашылу салтанаты өтті.  

Төмен көміртекті экономикаға біртіндеп көшуді қамтамасыз ету үшін іскерлік және инвестициялық шешімдер қабылдау кезінде климаттық тәуекелдерді есепке алуға бағытталған Chapter Zero жаһандық бастамасы дүние жүзінің 70-тен астам елінде белсенді түрде дамып келеді. Енді бұл қатарға Қазақстан да қосылды.

INSEAD әлемнің жетекші бизнес мектебі алғаш рет Chapter Zero Kazakhstan компаниясымен бірлесіп ҚР және Орта Азия үшін корпоративтік басқару бағдарламасын әзірлейді. Филиал бірқатар серіктестермен, соның ішінде «Астана» халықаралық қаржы орталығымен, Еуропа қайта құру және даму банкі, McKinsey, KPMG және Назарбаев Университетімен ынтымақтастықта жұмыс істейді.

Өз сөзінде энергетика вице-министрі Б. Ілияс: «Төмен көміртекті даму – тұрақты дамудың алғышарты және жаһандық климаттың өзгеруінің апатты салдарының алдын алуға бағытталған. Елімізде жаңартылатын және баламалы энергия көздерін дамыту бойынша бірқатар жобалар бар. Мемлекет басшысының тапсырмасы бойынша Қазақстанның 2060 жылға дейін төмен көміртекті даму тұжырымдамасы әзірленді. Бұл жобаларды іске асыру қоршаған ортаның сапасын жақсартып, климат өзгеруінен болатын сын-қатерлердің алдын алуға, технологиялық дамуға, жаңа жұмыс орындарының ашылуына, экономиканың көміртекті пайдалануын азайтуға, басқа да маңызды мәселелерге ықпал етеді. Қазақстанда алғаш рет жұмысын бастап отырған Chapter Zero Kazakhstan бастамасы сол себепті де өте маңызды қадам деп білеміз», - деп атап өтті.

 Өз кезегінде Chapter Zero Қазақстан бастамашыларының бірі Гүлзада Шакуликова: «Соңғы жылдары климаттың өзгеруі күллі адамзат үшін ортақ сын-қатер туғызып отыр. Өнеркәсіп, қаржы және бизнестің климаттың өзгеруін азайтуға және оған бейімделуге белсенді түрде қатысуы өте маңызды. Қазақстан орнықты болашаққа қол жеткізуді мақсат етеді және бұл бастама осы жолдағы маңызды қадам», - деп атап өтті.

Астанада Chapter Zero Kazakhstan ресми ашылу салтанатында климаттың өзгеруіне қарсы күресте корпоративтік басқарудың шешуші рөлін талқылау үшін бизнес көшбасшылары мен басқа да мүдделі тараптар жиналды.

• 29.03.2024
• 198