Мәжіліс жергілікті билік органдарының жауапкершілігін кеңейту туралы түзетуді бірінші оқылымда мақұлдады

ҚР Парламенті Мәжілісінің депутаттары «Қазақстан Республикасының кейбір заңнамалық актілеріне аудандық, қалалық және ауылдық билік деңгейлерінің дербестігі мен жауапкершілігін кеңейту мәселелері бойынша өзгерістер мен толықтырулар енгізу туралы» заң жобасын бірінші оқылымда мақұлдады.

Заң жобасы аудандық маңызы бар қалалардың, ауылдардың, кенттердің және ауылдық округтердің кіріс базасын кеңейту; бюджеттік рәсімдерді оңайлату; әкімшілік-аумақтық бірліктерге қойылатын талаптарды жетілдіру; жергілікті өкілді және атқарушы органдардың дербестігін кеңейту және жауапкершілігін күшейтуді көздейді.

Ұсынылған негізгі нормаларға толығырақ тоқталсақ:

1. ЖӨБ бюджетін нығайту мақсатында бюджеттің IV деңгейіне салықтар мен төлемдердің қосымша 4 түрін беру ұсынылады.
2. Ауылдық округтер әкімі аппаратының резервін құру ұсынылады. Бұл қаражат жергілікті қоғамдастықтың бастамасы бойынша кезек күттірмейтін шығындарға бағытталады және өз кірістерінің он пайызынан аспайды.
3. Бюджет кодексіне қаржы жылы кезеңінде аудан және ауылдық округ бюджеттері арасындағы ЖСТ көлемінің өзгеруіне жол бермейтін нақтылаушы норма енгізіледі.
4. Сондай-ақ, мәслихаттардың шешімдерін әділет органдарында тіркеу қажеттілігі жөніндегі норманы алып тастай отырып, бюджеттерді бекіту рәсімін оңайлату ұсынылып отыр.
5. Әкімшілік-аумақтық бірліктер санатын өзгерту тәртібін анықтау ұсынылуда. Осы Заңда белгіленген талаптарға сәйкес келмеген жағдайда қала мәртебесін бес жыл ішінде, ал ауылдарды үш жыл ішінде өзгерту жүзеге асырылады.
6. Сондай-ақ, мәслихат пен оның депутаттарының мәртебесін арттыру бойынша бірқатар түзетулер қарастырылған.

Мәслихат сессиясы төрағасының қызметін таратып, оның өкілеттігін мәслихат хатшысына беру ұсынылады. Сонымен қатар, әрбір облыс пен республикалық маңызы бар қалаларда мәслихаттың тұрақты комиссия төрағаларының босатылған екі лауазымын енгізу ұсынылуда.

• 09.02.2021
• 212