Маңғыстауда құқық бұзушылықтың алдын алу жөніндегі ведомствоаралық комиссияның отырысы өтті

17 сәуірде Маңғыстауда өңір басшысы Нұрлан Ноғаевтың төрағалығымен құқық бұзушылықтың алдын алу жөніндегі ведомствоаралық комиссияның отырысы өтті, деп хабарлайды Маңғыстау облысы әкімдігінің баспасөз қызметі.

Маңғыстау облысы полиция департаментінің жергілікті полиция қызметі басқармасының бастығы Әбдурасул Өтешов облыс аумағындағы құқық бұзушылық мониторингінің нәтижелері туралы баяндама жасады.

"Мониторингке сәйкес, үш айда, яғни, 2024 жылдың басынан бері  400 жол-көлік оқиғасы тіркелді, оның 366-сы елді мекендерде, 29-ы республикалық маңызы бар автомагистралдарда және 5-еуі жергілікті автожолдарда болған. Жол-көлік оқиғасының ең ауыр жағдайлары республикалық автожолдарда тіркелді, үш айда қаза тапқан 34 адамның 21-і (61,8%) осы жолдардағы апаттардың салдарынан ажал құшқан» - дейді жергілікті полиция қызметі басқармасының бастығы Әбдурасул Өтешов.

Полицейлердің айтуынша, жүргізушілер арасында ең көп таралған заң бұзу фактісі – ол жылдамдықты асыру. Осыған байланысты жүргізушілер арасында жауапкершілік деңгейін арттыру үшін техникалық бақылау құралдары пайдаланылады. Мәселен, бүгінгі таңда Маңғыстау облысында "Кибер шериф" борттық аппараттық-бағдарламалық кешені 21 патрульдік автокөлікке орнатылған. Құрылғы қалалық жолдарды, сондай-ақ республикалық және жергілікті маңызы бар трассаларды тәулік бойы күзетеді.

Отырысқа қатысушылар жолдардағы қауіпсіздікті қамтамасыз етудің маңыздылығын атап өтіп, есірткі және психотроптық заттардың заңсыз айналымына да тоқталды.

Отырысты қорытындылай келе облыс әкімі Нұрлан Ноғаев мынаны атап өтті:

"Жолдардағы қауіпсіздікті қамтамасыз ету және есірткінің заңсыз айналымына қарсы іс-қимыл жасау үшін барлық органдар мен ведомстволардың, сондай-ақ депутаттық корпус пен қоғамдық штабтың күш-жігерін біріктіру қажет. Азаматтардың қауіпсіздігі мен заңдылықты сақтау саласындағы басым міндеттер үнемі назар аударуды және үйлескен әрекеттерді талап етеді. Жол инфрақұрылымын жақсарту, тиімді патрульдеу және қылмысқа қарсы алдын-алу шараларын жалғастыру біздің стратегиямыздың ажырамас бөлігі. Бірлескен күш-жігердің арқасында ғана біз азаматтарымыз үшін қолайлы және қауіпсіз орта құрып, облыстың тұрақты дамуын қамтамасыз ете аламыз", - деп қорытындылады Нұрлан Ноғаев.

• 18.04.2024
• 148