17 сәуірде Астанада Қазақ-Қырғыз жастар форумы өтті

Қырғыз Республикасы Президенті Садыр Жапаровтың Қазақстан Республикасына ресми сапары аясында Астанада Қазақ-Қырғыз жастар форумының ашылуы өтуде. Форумның негізгі мақсаты – Қазақстан мен Қырғызстан Жастар ұйымдары мен студенттерінің бірлігін арттыру, екіжақты жобалар мен бағдарламаларды қалыптастыру үшін жағдай жасау, бауырлас ел жастарына мәдениетаралық диалог пен ынтымақтастықты дамытатын алаң қалыптастыру. Форумның ашылу рәсімінде Қазақстан Республикасының мәдениет және ақпарат вице-министрі Евгений Кочетов, Қырғыз Республикасының мәдениет, ақпарат, спорт және жастар саясаты министрінің орынбасары Марат Тағаев кіріспе сөз сөйледі. Евгений Кочетов өз сөзінде Қазақстан мен Қырғыз арасындағы ғасырларға жалғасқан достық қарым-қатынасты ескере отырып, екіжақты жастар ынтымақтастығын нығайтудың маңыздылығын атап өтті.

«Мәдениет, білім, креативті индустрия, ғылым және кәсіпкерлік саласындағы жобаларды қолдау жастарға өз потенциалын жүзеге асыруына көмектеседі. Сөйтіп екі ел арасындағы түсіністікті арттырып, байланысты тереңдетуге атсалыса алады» – деді вице-министр.

Марат Тағаев өз кезегінде екі ел арасындағы татулық, келісім мен ынтымақтастыққа бағытталған бірегей алаң ұйымдастырғаны үшін Мәдениет және ақпарат министрлігіне алғысын білдірді.

«Жастар – мемлекет болашағы. Біздің миссиямыз – жастардың дамуға, тәжірибе алмасуға және білім алуға мүмкіндігін кеңейту және қамтамасыз ету. Форум өзекті мәселелерді талқылауға және екі ел министрліктері мен жастар ұйымдары арасындағы бірлесе жұмыс жасау стратегиясын әзірлеуге мүмкіндік беретініне сенімдімін», - деді Марат Тағаев.

Форумға республикалық жастар ұйымдарының басшылары, жастар және студенттер қауымдастығының өкілдері, қоғам қайраткерлері, түрлі саладағы жас мамандар қатысты. Іс-шара барысында «Цифрлы болашақ: Қазақстан мен Қырғызстан жастары үшін заманауи трендтер мен мүмкіндіктер», «Климатқа белсенді әрекет ету – екі ел жастарының бірлігін нығайту құралы ретінде» және т. б. өзекті тақырыптар талқыланды. Форумның нәтижесі бойынша бірлескен жобалар мен бастамаларды құру және оларды іске асыру арқылы Қазақстан мен Қырғызстан жастарының бірлігін нығайту жұмыстарын жалғастыру. Сонымен қатар екі ел жастарын климаттың өзгеруі мәселелерін талқылауға және оны шешуге, IT және креативті индустрияларды дамытуға белсенді қатысуға тарту.

• 26.04.2024
• 169