Мектептегі тегін тамақ: Нұрлан Ноғаев білім беру нысандарында бақылауды күшейтуді тапсырды

Маңғыстаудағы балабақшалар мен мектептерді ыстық тамақпен қамтуға 9,8 млрд теңге бөлінген. Бұл туралы Маңғыстау облысының экономика және бюджеттік жоспарлау басқармасының басшысы Марина Альбекова мәлімдеді. Аймақ басшысы Нұрлан Ноғаев білім беру нысандарын ыстық тамақпен қамту мәселесіне деген бақылауды күшейтуді тапсырды. Бұл туралы Маңғыстау облысы әкімдігінің баспасөз қызметі хабарлады.

Марина Альбекова мәлім еткендей, 2023 жылы облыстағы жергілікті бюджеттің меншікті кірістері 184 миллиард теңгеден 241 миллиард теңгеге дейін өскен. 2024 жылы кіріс 220 миллиард теңгеден 264 миллиард теңгеге дейін артқан.

2023-2024 жылдарға арналған өңірлік даму бюджетінде әлеуметтік салаға бөлінген қаржының үлесі - 33%, сумен жабдықтау және су бұру бағытында – 25%, газ және жылумен жабдықтау бағытында – 16%, инженерлік желілерді дамытуға көзделген қаржының үлесі - 11%, көлік инфрақұрылымын дамытуда - 9% және басқа салаларда - 6% құрады.

– 2023 жылы мемлекеттік балабақшаларда 87 мыңнан астам бастауыш сынып оқушылары мен аз қамтылған отбасының балаларын, халықтың әлеуметтік осал топтарына жататын 3 659 баланы ыстық тамақпен қамтуға қосымша 1,9 млрд теңге қарастырылды. Сонымен қатар, 2024 жылдан бастап халықтың әлеуметтік осал топтарына жататын жекеменшік мектептердің 2 мыңнан астам оқушысын ыстық тамақпен және оқу құралдарымен қамтамасыз ету үшін көрсетілген шығындарға қосымша 4,7 млрд теңге жоспарланды, - деді Марина Альбекова.

Жиын барысында облыс әкімі Нұрлан Ноғаев мектеп оқушыларын сапалы ыстық тамақпен қамту мәселесіне тоқталды.

– Мектеп оқушыларын ыстық тамақпен қамтамасыз ету үшін қаржы бөлініп отыр. Сондай-ақ, бізге мектеп асханалары дайындайтын тағамды балалардың жегісі келмейді деген ақпарат жиі түседі. Осыған байланысты барлық атқарушы органдарға, білім беру мекемелеріне, сондай-ақ тікелей мектептердің өздеріне ескертерім, балалардың сапалы және әртүрлі тамақтануын қамтамасыз ету мақсатында кешенді жұмыс жүруі тиіс. Мектеп оқушылары пайдалы тағаммен қамтылуы керек. Бұл ретте білім алушылардың өз мүдделері сияқты барлық талаптар да қатаң сақталуы керек», - деп түсіндірді Нұрлан Ноғаев.

Сонымен бірге, аппарат отырысында Маңғыстау облысы бойынша Мемлекеттік кірістер департаментінің басшысы Серік Манзоров атқарылған жұмыстар мен департаменттің ағымдағы жылға арналған жоспарлары туралы баяндады.

– Өткен жылдың соңында Кіріс комитетінің құзырындағы кірістерден мемлекеттік бюджетке 623,8 млрд теңге түсіп, өткен жылмен салыстырғанда 86,4 млрд теңгеге өсті. Республикалық бюджеттің кірісі 37,6 млрд теңгеге өсіп, өсу қарқыны 111,2%, ал жергілікті бюджет кірісі 48,7 млрд теңгеге өсіп, 124,3% құрады, - деді Серік Манзоров.

Ал жергілікті бюджетке өткен жылдың соңында 249,9 млрд. теңге салық түскен. Спикердің айтуынша, бюджетке 17,3 миллиард теңгеден астам қаржы түсіп, жоспарланған жылдық жоспар 107,4 пайызға орындалған.

Айта кетейік, бүгінде облыста 76 950 кәсіпкерлік субъектісі тіркелген, оның 17 232-сі заңды тұлға (16 881 белсенді), 59 329-ы жеке кәсіпкерлер (58 882 белсенді) және 389-ы нотариустар мен адвокаттар. Өткен жылмен салыстырғанда олардың саны 18 622-ге, 32%-ға артқан.

• 02.05.2024
• 190