Маңғыстауда Қазақстан халқының бірлігі күні қарсаңында Атырау облысынан эвакуацияланған азаматтарға көмектескен еріктілер марапатталды

Ақтаудағы Достық үйінде Қазақстан халқының бірлігі күніне арналған салтанатты шара өтті, деп хабарлайды Маңғыстау облысы әкімдігінің баспасөз қызметі.

Су тасқынының салдарын ескерсек, биыл аймақтағы бірлік күні ерекше маңызға ие болып отыр. Су тасқынынан зардап шекпеген Маңғыстау облысында Атырау облысының эвакуацияланған тұрғындарына жағдай жасалды. Эвакуациялау пункттерінде жатын орындар дайындалып, тамақ таратылды.

Маңғыстауға эвакуацияланған халыққа көмек көрсетуге белсене атсалысқандардың барлығы бүгінгі күннің нағыз батырлары деуге болады.

Шараны ашқан аймақ басшысы Нұрлан Ноғаев жиналғандарды келе жатқан мерекемен құттықтап, еліміздегі ынтымақ пен бірлікті, тыныштықты сақтауға ұдайы үлес қосып жүрген барша маңғыстаулықтарға алғысын білдірді.

Маңғыстау облысының әкімі Нұрлан Ноғаев атап өткендей, су тасқыны кезінде көмек қолын созған адамдардың арасында назардан тыс қалмайтын азаматтар аз емес. Сондай-ақ, көмек көрсеткен әрбір адам кезең-кезеңімен марапатталатынын атап өтті.

– Биыл Қазақстанның басынан өткен су тасқыны отандастарымыз үшін үлкен сынақ болды. Мемлекет басшысы Қасым-Жомарт Тоқаев Қазақстан халқы Ассамблеясының ХХХІІІ сессиясында атап өткендей, бұрын-соңды болмаған табиғи апатты абыроймен еңсеруде еліміздің мызғымас бірлігі айқын көрініс тапты. Осындай қиын жағдайда Қазақстан халқы Ассамблеясы барлық өңірлерде гуманитарлық көмекті қабылдайтын және волонтерлердің жұмысын үйлестіру орталықтарын ұйымдастырды. «Жүректен жүрекке» жалпыұлттық акциясы аясында облысымыздағы зардап шеккен аудандарға азық-түлік пен алғашқы қажеттілік тауарлары да жөнелтілді. Қайырымдылық және гуманитарлық көмектерді жинауға, эвакуациялауды ұйымдастыруға және азаматтарды ақпараттандыруға барлық этномәдени бірлестіктер, сондай-ақ еріктілер, құтқарушылар, әскери қызметкерлер, медицина қызметкерлері, мемлекеттік қызметшілер белсене қатысты, - деді Нұрлан Ноғаев.

• 02.05.2024
• 231