Маңғыстауда зәйтүн ағаштары қалай өсіріледі

Маңғыстауда агроөнеркәсіп кешеніндегі ірі инвестициялық жобалардың ішінде зәйтүн ағашын өсіру бойынша пилоттық жоба жүзеге асып жатыр. Құрық ауылында егілген екі мың зәйтүн ағашы тамыр жайып, жақын арада алғашқы жемісін беретіні белгілі болды. Бұл туралы аймақ басшысы Нұрлан Ноғаевпен кездесуде халықаралық зәйтүн кеңесінің президенті Георгий Сванидзе мен Грузияның Экономика және тұрақты даму вице-премьер-министрінің кеңесшісі Жақып Марабаев айтып өтті, деп хабарлайды Маңғыстау облысы әкімдігінің баспасөз қызметі. 

Халықаралық зәйтүн кеңесінің президенті Георгий Сванидзе кездесуге қатысушыларды Грузиядағы зәйтүн өндіру және өңдеу өнеркәсібімен таныстырып, сондай-ақ Қазақстандағы бұл саланың кезең-кезеңімен даму үдерісі туралы айтты. Өңдеу зауытын іске қосу және қазақстандық зәйтүнді шетелге экспорттау үшін қажетті халықаралық сертификат алу жоспарда бар.

– Маңғыстауда зәйтүн плантациясы Құрық ауылында орналасқан: егілген екі мың зәйтүн ағашы тамыр жайды. Олардың тамыр жайғаны ағаштардың ауа райының қиын жағдайларына бейімделгендігін көрсетеді. Бірнеше аптаның ішінде облыстың әртүрлі аудандарына тағы бір жүк көлігі көшет жіберуді жоспарлап отырмыз. Жергілікті атқарушы органдардың белсенді қолдауының арқасында Қазақстанда зәйтүн мәдениетін дамытудың орасан зор әлеуетін көріп отырмыз. Бұл жаңа жұмыс орындарын ашып қана қоймай, экспорттық болашағы бар кәсіпкерлікті дамытудың қозғалтқышына айналады. Зәйтүн майы жай өнім емес, ол денсаулық пен ұзақ өмірдің қайнар көзі. Осы аймақтың ерекше жағдайларының арқасында қазақстандық зәйтүн майы әлемдегі ең үздіктердің біріне айналатынына сенімдіміз, - деді Халықаралық зәйтүн кеңесінің президенті Георгий Сванидзе.

Георгий Сванидзе Грузияның Қазақстанда зәйтүн өсірудегі білімі, тәжірибесі және инновациялары туралы айтуға дайын екенін атап өтті. Ол өз тарапынан Қазақстанға зәйтүн майынан түсетін әлемдік кірістің 90% және оның саудасының 74% бақылайтын ұйым – Халықаралық Зәйтүн Кеңесіне мүшелікке өтуге көмектеседі. 

Зәйтүн ағашын өсіру тек Қарақия өңірімен ғана шектелмейді. Сондай-ақ облыстың басқа аудандарына қосымша көшет егу жоспарланып отыр. Жиынға қатысушылар осы мақсатқа қолайлы жер телімін бөлу мәселесін талқылады.

Маңғыстау облысының әкімі Нұрлан Ноғаев Мемлекет басшысының Қазақстанның аграрлық саласына, заманауи аграрлық ғылымды дамытуға және агроөнеркәсіп кешеніне инновацияларды белсенді енгізуге үлкен көңіл бөліп отырғанын атап өтті. Осыған байланысты үш жыл ішінде агроөнеркәсіп кешеніндегі қайта өңдеу өнімдерінің үлесін 70% жеткізу міндеті қойылды.

Тараптар өңірімізде жоспарланған жобаларды жүзеге асыру бойынша жұмыс барысын жалғастыруға келісті.

• 03.05.2024
• 237