Нұрлан Ноғаев: Заңсыз құрылыс тұрғындардың өмірі мен денсаулығына қауіп төндіреді

Ақтауда Маңғыстау облысы мәслихатының кезекті сессиясы өтті. Күн тәртібінде 2024 жылға арналған облыстық бюджетті нақтылау жобасы қаралды. Сессияны қорытындылаған өңір басшысы Нұрлан Ноғаев облыс орталығындағы заңсыз құрылыс мәселесіне назар аударды. Бұл туралы Маңғыстау облысы әкімдігінің баспасөз қызметі хабарлады.

Маңғыстау облысының экономика және бюджеттік жоспарлау басқармасының басшысы Марина Альбекова депутаттарға 2024 жылға арналған бюджетті нақтылау жобасын таныстыра отырып, бір күн бұрын Мемлекет басшысы қазіргі экономикалық жағдайдың бірқатар негізгі міндеттеріне назар аударғанын еске салды. Марина Альбекова сондай-ақ Үкімет квазимемлекеттік сектор субъектілерінің инвестициялық саясатын жүзеге асыру арқылы экономикалық өсу резервтерін анықтайтын шараларды белгілеп, сондай-ақ облигациялық қарыз беру арқылы тұрғын үй сатып алу туралы шешім қабылданғанын атап өтті. 

– Осы мақсатта «Самұрық-Қазына» қоры есебінен өңірлердегі халықтың әлеуметтік осал топтарына жататын азаматтар баспаналы болады. Маңғыстау облысында 672 тұрғын үйді сатып алуға 10,9 млрд теңге бөлу жоспарланып отыр. Пәтерлердің орташа ауданы 60 шаршы метр болуы керек. Бұл ретте рұқсат етілген ең жоғары аумақ – 80 шаршы метр», – дейді Марина Альбекова.

Сонымен қатар ол 2024 жылға арналған бюджет бекітілген кезде халықтың әлеуметтік осал тобынан шыққан азаматтарға 154 пәтер сатып алуға республикалық бюджеттен 2,1 млрд теңге бөлінгенін атап өтті. Басқарма басшысы хабарлағандай, қазір конкурстық рәсімдер өтіп жатыр. 

Маңғыстау облысының әкімі Нұрлан Ноғаев өз сөзінде сала басшыларын осы бөлініп отырған бюджетті игеруге назар аудартып, бұл бағыттағы жұмыстарды күшейтуді тапсырды.

– Қазір қоғамдағы ең өзекті мәселелердің бірі – баспана мәселесі. Тұрғын үймен қамту дегеніміз - бұл тек үй салу немесе құрылыс жүргізу емес: бұл жайлы және қауіпсіз өмір сүру ортасын құру деген сөз. Нысандардың құрылысы заңға сәйкес болуы маңызды. Біз қазір заңсыз құрылыспен күресіп жатырмыз. Бұған бірнеше себеп бойынша жол берілмейді: біріншіден, бұл заң бұзушылық; екіншіден, бұл айналаға қауіп төндіреді, өйткені рұқсат болмаса құрылыс нормалары бұзылады, халықтың өмірі мен денсаулығына қауіп төндіруі мүмкін; үшіншіден, бұл инженерлік желілерге қосымша жүктеме түсіріп, олардың тұрақсыз жұмыс істеуіне әкеп соқтыруы мүмкін, - деді Нұрлан Ноғаев.

• 03.05.2024
• 237