Маңғыстауда 100 мың тонна астыққа арналған терминал ашылады

Маңғыстау облысында 2018 жылдан бері тоқтап тұрған Бейнеу астық терминалын қалпына келтіру жұмыстары басталды. Кәсіпорынның жаңа иесі - «Евразия Транс Логистик» ЖШС. Маңғыстау облысының әкімдігі «Халық» қорынан қаржы алып, «Каспий» әлеуметтік-кәсіпкерлік корпорациясымен бірлесе отырып, БАТ жұмысын қалпына келтіру және одан әрі жұмыс істеуге бағытталған іс-шараларды үйлестіруді қамтамасыз етеді. Бұл туралы Маңғыстау облысы әкімдігінің баспасөз қызметі хабарлады.

Терминалдың жобалық қуаттылығына тоқталсақ, нысанға бір мезетте 100 мың тонна астық сыяды, сондай-ақ тәулігіне 400 тонна ұн шығара алады. Сонымен қатар, терминал жылына 25 мың тонна кебек өндіруге мүмкіндік береді. Терминалдың жүк айналымы жылына 2 миллион тоннаны құрауы мүмкін.

Осылайша, осы нысанды іске қосу арқылы үй жануарларын жеткілікті мөлшерде жеммен қамтамасыз етуге мүмкіндік туады.

- Қыс кезінде кебек пен жемге деген қажеттілік жыл сайын 25-28 мың тоннаға дейін артады. Бейнеу астық терминалының іске қосылуы Маңғыстау облысындағы бұл сұранысты толық қанағаттандырады. Қазіргі таңда кебек Қостанай облысы, Орал және Ресейден тасымалданып отыр. Ресейде олардың өндірісі арзан болғанымен, тасымалдау өнімнің өзіндік құнын арттырады. Жергілікті өндіріс көлік тасымалын есептегенде, шығынды  15-20% дейін азайтады. Осылайша, біз басқа өңірлерден келетін өнімнен бас тарта аламыз, - деді Маңғыстау облыстық ауыл шаруашылығы басқармасының басшысы Қазбек Тәшімов.

Ал, «Маңғыстау өнеркәсіптік палатасы» ЗТБ төрайымы Меруерт Құлымбаева Бейнеу астық терминалы 200-ге жуық жұмыс орнын ашуға мүмкіндік беретінін мәлімдеді. 

- Құрама жем өндірісі Маңғыстау облысының барлық елді мекендері сияқты Бейнеу өңірінің мал шаруашылығына қолдау болмақ. Яғни, енді жем Маңғыстау және Атырау облыстарының тұрғындары үшін қолжетімді болады. Бейнеу астық терминалының жұмысы жоғары сұрыптағы, сондай-ақ бірінші және екінші сұрыптағы бидай ұнын шығаруға мүмкіндік береді, - деді Меруерт Құлымбаева. 

«Евразия Транс Логистик» ЖШС директоры Жаңбырбай Доспаев Бейнеу астық терминалындағы қайта жанданса, өнімдерді Өзбекстан, Тәжікстан, Ауғанстан сияқты шет елдерге экспорттау жоспарланып отырғанын айтты.

- ҚР Премьер-Министрінің орынбасары Серік Жұманғарин осыған дейін Ауғанстан Премьер-министрінің орынбасары Абдул Ғани Барадармен кездесуде Ауғанстанға қазақстандық астық пен ұн жеткізу көлемін ұлғайту үшін Бейнеу терминалының мүмкіндігін қарастыруды ұсынған болатын. Қазақстан Ауғанстан нарығына осы тауарларды жеткізіп отырған және жеткізетін сенімді серіктес екенін айтып өтті. Терминалда барлық қажетті өндірістік инфрақұрылым бар. Ол өнімді әрі қарай экспортқа тасымалдау үшін құрлықтағы тиеу қоймасы терминалының функцияларын орындай алады. Осыған байланысты Маңғыстау өнімдерін Ауғанстанға экспорттау біздің өңірге ғана емес, жалпы Қазақстанға да мультипликативті экономикалық тиімділік береді, - деді Жаңбырбай Доспаев.

Еске салайық, Бейнеу астық терминалы (БАТ) 2010 жылы пайдалануға берілген. 16 гектар аумақта астық өңдеу және жем өндіру бойынша автоматтандырылған цехтар мен элеватор жұмыс істеді. Мемлекет басшысы Қасым-Жомарт Тоқаев бұған дейін Маңғыстау облысының әлеуметтік-экономикалық дамуы аясында терминалды қалпына келтірудің маңыздылығын атап өткен болатын.

• 06.05.2024
• 273