Маңғыстауда Отан қорғаушылар күні мерекеленіп жатыр

Отан қорғаушылар күні қарсаңында өңір басшысы Нұрлан Ноғаев Атырау облысының тұрғындарын Маңғыстауға эвакуациялауға белсене атсалысқан әскери қызметкерлерге, құтқарушылар мен полиция қызметкерлеріне алғыс хат табыс етті. Бұл туралы Маңғыстау облысы әкімдігінің баспасөз қызметі хабарлады.

Салтанатты шара Ақтаудағы Достық үйінде өтті. Қарулы күштердің ардагерлері, құқық қорғау органдарының өкілдері, әскери қызметшілер мен құтқарушылар бір дөңгелек үстел басына жиналды.

Маңғыстау облысының әкімі Нұрлан Ноғаев жиналған қауымды Отан қорғаушылар күнімен құттықтады.

Көктемгі су тасқыны кезінде көмек көрсету үшін Атырау облысына аттанған әскери қызметкерлер де алғыс хатпен марапатталды.

• Отан қорғаушылар күні - халқымыздың ерлік дәстүрін, Отанға деген сүйіспеншілік пен ұлттық рухты паш ететін қасиетті мереке. Отан қорғау – қашан да қастерлі ұғым, қасиетті парыз. Елімізді қиындық пен сынақтан қорғайтын қайратты ерлерді құрметтейміз. Халықтың тыныштығы мен әл-ауқаты үшін үлкен жауапкершілік арқалаған сіздерсіздер. Көрші облыстарда болған су тасқыны кезінде құтқарушылар, әскерилер, полицейлер тынымсыз еңбек етті. Әр маңғыстаулық қолдан келгенше көмек беруге даяр болды. Мемлекет басшысы Қасым-Жомарт Кемелұлы Тоқаев айтып өткендей, қазақстандық әскери қызметкерлер БҰҰ аясындағы түрлі халықаралық миссияларға қатысады. Биыл олар Голан жоталарында алғаш рет тапсырмаларды өз бетінше орындауға кірісті. Бұл біздегі әскер дайындығының мықты екенін және Қазақстанның әлемдік аренадағы беделінің жоғары деңгейде екенін көрсетеді. Біздің тәуелсіздігіміз бен тұтастығымызды, тыныштығымыз бен бейбіт тірлігімізді қас қақпай күзетіп тұрған, халқымызға қорған болған ұлттық әскеріміздің айбыны арта берсін!,– деді Нұрлан Ноғаев.

• 06.05.2024
• 218