ҚДБ ШЫҰ БАБ сарапшылары мен үйлестірушілерінің отырысын өткізді

«Қазақстанның Даму Банкі» АҚ («Бәйтерек» ҰБХ» АҚ еншілес ұйымы) төрағалығымен 16 мамырда онлайн-нысанда Шанхай Ынтымақтастық ұйымының Банкаралық бірлестігінің (бұдан әрі – Бірлестік, ШЫҰ БАБ) сарапшылары мен үйлестірушілерінің кеңесі өтті. Бірлестікке мүше сегіз банктің атынан іс-шараға қатысушылар тұрақты даму, экология және климаттың өзгеруі тақырыптарына ерекше назар аударды.

Отырыс барысында ШЫҰ МБО сарапшылары ESG жобаларын қоса алғанда, бірлескен жобаларды мүше банктердің белсендірек бірлескен қаржыландыруы үшін интеграцияның жаңа нысандарын әзірлеу және енгізу мүмкіндіктерін талқылады. Бұл бағыт екіжақты және көпжақты келісімдерді қамтиды.

Осы пікірталас аясында ҚДБ ESG қаржыландыру саласындағы ынтымақтастық туралы меморандумға қол қою жөнінде бастама көтерді. Бұл құжаттың негізгі мақсаты – қажетті қосымша құжаттарды әзірлеу және қол қою арқылы серіктестіктерді болашақта зерттеу мен дамытудың негізгі міндеттерін анықтау.

Сондай-ақ сарапшылар отырысында ұйымның құрамын кеңейту және ШЫҰ диалогы бойынша бақылаушы және серіктес мемлекеттердің қаржы институттарымен ынтымақтастықты одан әрі дамыту, сондай-ақ кадрлар даярлау және тәжірибе алмасу саласындағы ынтымақтастық мәселелері талқыланды.

Бұдан әрі бағдарлама аясында ШЫҰ БАБ үйлестірушілерінің онлайн-кездесуі өтті, онда Үндістанның инфрақұрылымдық қаржы компаниясының, Қытайдың Мемлекеттік Даму Банкінің, «РСК Банк» ААҚ (Қырғыз Республикасы), «Хабиб Банк Лимитед» (Пәкістан Ислам Республикасы), «ВЭБ.РФ» мемлекеттік даму корпорациясының (Ресей Федерациясы), «Амонатбанк» Тәжікстан Республикасының Жинақ Банкі» мемлекеттік унитарлық кәсіпорнының және «Өзбекстан Республикасы Сыртқы экономикалық қызметінің Ұлттық Банкі» АҚ өкілдері сөз сөйледі.

Отырысқа қатысушылар ұйымды жетілдіруге, түрлі бағыттар бойынша өзара іс-қимылды жандандыруға және практикалық нәтижелерге қол жеткізуге бағытталған бірлескен жұмысқа дайын екендіктерін білдірді.

Айта кетейік, ШЫҰ БАБ кеңесінің отырысы 2024 жылғы 25 маусымда Астана қаласында жоспарланған.

• 17.05.2024
• 241