5 күндік семинар-тренинг өтуде

Қазақстан Республикасында этномедиация институтын дамыту мақсатында ҚР Мәдениет және ақпарат министрлігінің ұйымдастыруымен 2024 жылғы 20-24 мамырда Қонаев қаласында Алматы және Жетісу облыстарының, Алматы қаласының азаматтары, жергілікті атқарушы және құқық қорғау органдарының қызметкерлері, тәрбие жұмысы жөніндегі директор орынбасарлары, мектеп психологтары, сондай-ақ этномәдени бірлестіктердің өкілдері мен басқа да санаттағы азаматтар үшін 5 күндік семинар-тренинг өтуде.

Іс-шараның мақсаты – тыңдаушыларды жергілікті жерлерде этносаралық оқиғалар мен қақтығыстарды уақтылы анықтау және алдын алу дағдыларына үйрету.

Ағымдағы жылдың 22 мамырында семинар-тренингке Министрліктің Этносаралық қатынастарды дамыту комитетінің төрағасы Ғалым Шойкин қатысып, тыңдаушыларға этносаралық шиеленіс пен жанжалдың алдын алу бойынша мемлекеттік органдардың өзара іс-қимылы, сондай-ақ этносаралық саладағы мемлекеттік саясаттың басымдықтары, проблемалық мәселелерді шешу және алдын алу тәсілдері туралы ақпараттарды жеткізді.

Спикер 2022 жылдан бастап этномедиацияны дамыту бағытында Министрлік тарапынан үлкен жұмыс жүргізіліп жатқанын атап өтті. Мәселен, 2022-2023 жылдары 2100-ден астам әртүрлі санаттағы азаматтарды этномедиацияның базалық негіздеріне оқытты. Ағымдағы жылы бұл жұмыс жалғасын тауып, еліміздің басқа да өңірлерінде өткізілетін болады.

Сондай-ақ Ғалым Шойкин сол күні өткен Алматы облысының этномәдени бірлестіктерімен кездесу барысында Қазақстан халқы Ассамблеясының XXXIII сессиясында берілген Мемлекет басшысы Қ.К.Тоқаевтың тапсырмаларының орындалу барысына тоқталып, Президенттің Атырау қаласындағы Ұлттық құрылтай отырысында ұсынған гуманитарлық-идеологиялық доктринамен ҚХА қызметінің үндесуіндегі маңызды аспектілерді, жанжалдың алдын алу бойынша Ассамблеяның жұмысын күшейтудің маңыздылығын атап өтті.

• 22.05.2024
• 159