Қазақстанның Даму Банкіне ADFIAP марапаттары берілді

«Қазақстанның Даму Банкі» АҚ («Бәйтерек» холдингінің еншілес құрылымы) Азия-Тынық мұхиты аймағын дамыту қаржы институттары қауымдастығының (ADFIAP) бірқатар наградаларымен марапатталды. Марапаттау рәсімі ADFIAP-тың 47-ші жыл сайынғы кездесуі аясында Камбоджа Корольдігінің Пном Пен қаласында 2024 жылғы 16 мамырда өтті. Іс-шараға ҚДБ атынан Қорландыру және халықаралық ынтымақтастық департаментінің бас менеджері Анна Загоскина қатысты.

ADFIAP – БҰҰ Экономикалық және әлеуметтік кеңесі жанындағы консультативтік мәртебесі бар үкіметтік емес ұйым. Оның қызметі өңірдегі тұрақты экономикалық, экологиялық, әлеуметтік даму мен өсуге жәрдемдесуге бағытталған. Оған Азия мен Океанияның 38 елінен 90-ға жуық қаржы институттары кіреді.

ADFIAP Марапаттау жөніндегі кеңесінің шешімі бойынша ҚДБ Хромтау қаласында шламды қайта өңдеу жөніндегі ERG Green фабрикасын салу жөніндегі инвестициялық жоба үшін «Қоршаған ортаны дамыту» санатында атап өтілді. Бұл жоба Донской КБК тарихи жинақталған қалдықтарын қайта өңдеу арқылы Ақтөбе облысындағы экологияны жақсартуға мүмкіндік береді (ERG тобының «Қазхром» ТҰК құрамына кіреді).

Сонымен қатар, Банк «Үздік веб-сайт» және «Үздік тұрақтылық туралы есеп» номинациялары бойынша арнайы марапаттарға ие болды.

Қазақстанның Даму Банкі даму институты бола отырып, тұрақты даму және жауапты инвестициялау қағидаттарын ұстанады, өз қызметінің Қазақстан экономикасына, қоғамға, қоршаған ортаға әсеріне көп көңіл бөледі. Банк әлеуметтік жауапты ұйым ретінде ESG факторларын өз қызметіне енгізеді және біріктіреді.

ADFIAP марапаттары Банктің «жасыл» және тұрақты күн тәртібін дамыту саласындағы, сондай-ақ корпоративтік даму қағидаттарын іске асырудағы қызметін атап өтеді.

Естеріңізге сала кетейік, ҚДБ 2023 жылдың мамыр айынан бастап ADFIAP-тың арнайы мүшесі болып табылады.

• 24.05.2024
• 151