Республикалық этномәдени бірлестіктердің басшыларымен кездесу өтті

Алматы қаласындағы Республикалық Достық үйінде Қазақстан халқы Ассамблеясы Төрағасының орынбасары – Қазақстан Республикасы Президенті Әкімшілігінің Қазақстан халқы Ассамблеясы Хатшылығының меңгерушісі М.Әзілхановтың және Қазақстан Республикасы Мәдениет және ақпарат министрлігінің Этносаралық қатынастарды дамыту комитетінің төрағасы Ғ.Шойкиннің қатысуымен республикалық этномәдени бірлестіктердің басшыларымен кездесу өтті.

Өз сөзінде Ғалым Шойкин Қазақстан халқы Ассамблеясының XXXIII сессиясында Мемлекет басшысы Қ.К.Тоқаевтың берген тапсырмаларының орындалуы бойынша атқарылып жатқан жұмыстарға тоқталып өтті.

Спикер бүгінгі таңда Министрлікке 14 маңызды тапсырма жүктелгенін және олардың сапалы әрі тиімді орындалуын қамтамасыз ету үшін қажетті алгоритмдер мен кешенді шаралар қамтылған 6 жол картасы әзірленгенін жеткізді. Бұл ретте халықпен тығыз қарым-қатынас орнатуға, ксенофобияның кез келген түріне қоғамда төзбеушілікті қалыптастыруға, реформаларды іске асыруға және мемлекеттік органдармен бірлесе қызмет жасауда ҚХА-ның қатысуын күшейтуге, мәслихаттармен, жергілікті ҮЕҰ және қауымдастықтармен байланыс орнатуға, жастарды ҚХА-ға тартуға, этномедиацияны дамытуға және жергілікті әкімдерді этносаралық мәселелерді шешуге жұмылдыруға баса назар аударылды.

Сондай-ақ, ҚХА-ның 30 жылдығын өткізу жөніндегі Үкіметтің іс-шаралар жоспарының жобасы әзірленіп, қазіргі уақытта жауапты мемлекеттік органдардан ұсыныстар жиналуда.

Осыған орай, ҚХА-ның республикалық этномәдени бірлестіктеріне осы бағытта тиісті шаралар жоспарлау және Іс-шаралар жоспарына ұсынымдар беру ұсынылды.

Өз кезегінде этномәдени бірлестіктер өкілдері өз ұсыныстарын білдіріп, Қазақстан халқы Ассамблеясының 30 жылдығын мерекелеуге атсалысуға дайын екендіктерін жеткізді.

Кездесу барысында ҚХА-ның жаңа жобаларын, олардың ішінде Ғ.Шойкиннің атап өткен «Кітапханаға кітап сыйлайық!» жобасының тұжырымдамасы, этномәдени бірлестіктерден қазақ тілінде кітаптарды кітапханаларға тапсыру арқылы мемлекеттік тілді этносаралық қатынас тілі ретінде насихаттау, оны күнделікті өмірде пайдалану, сондай-ақ Қазақстан этностарының әдеби-мәдени мұрасын дәріптеу және «Кітап – сарқылмас қазына» жобасы аясында Қазақстан этностарының танымдық тарихи-мәдени мұрасы мен көрнекті өкілдерінің адамгершілік-өнер туындыларын мемлекеттік тілге аудару мәселелері көтерілді.

Бұдан бөлек, республикалық этномәдени бірлестіктердің жастарымен бейресми кездесу ұйымдастырылды.

• 27.05.2024
• 145