Маңғыстау облысының әкімі «Жайлы мектеп» ұлттық жобасы аясында салынып жатқан білім беру нысандарының құрылысымен танысты

28 мамыр күні Маңғыстау облысының әкімі Нұрдәулет Қилыбай «Жайлы мектеп» ұлттық жобасы аясында салынып жатқан 4 білім беру нысанының құрылысымен танысты, деп хабарлайды Маңғыстау облысы әкімдігінің баспасөз қызметі.

Маңғыстау облысы аумағында «Жайлы мектеп» жобасының аясында 2025 жылға дейін 22 000 оқушы орнына арналған 21 жаңа мектеп салынады. 2024 жылы – 12 600 орындық 13 мектепті пайдалануға беру жоспарлануда. Бұл білім беру нысандары 16, 17, 19, 20, 33, 38, 39 шағынаудандары, Өмірзақ ауылы, Рауан тұрғын массивінде орналасқан.

​«Жайлы мектеп» жобасындағы барлық 21 мектеп, онымен қоса, білім беру инфрақұрылымын қолдау қоры есебінен 4 мектеп және жер қойнауын пайдаланушылардың қаражаты есебінен салынып жатқан 1 мектептің құрылысы аяқталып, пайдалануға берілген соң облыста 15 үш ауысымды мектепте, апат жағдайындағы 3 мектепте және 31 мектепте 10435 орын тапшылығы жойылады.

Аймақ басшысы жауапты мердігерлер мен жобаны үйлестіруші «Самұрық-Қазына» қорының өкілдеріне құрылыс сапасын қатаң бақылауда ұстауды тапсырды.

- Бұл президент Қасым-Жомарт Тоқаевтың бастамасымен қолға алынған жоба. Ең алдымен, құрылыс сапасына айрықша мән беру керек. Қауіпсіздік бірінші орында. Жұмысшылар санын көбейтіп, жұмысты жеделдету қажет, - деді Нұрдәулет Қилыбай.

Айта кетейік, білім басқармасының мәліметінше, жайлы мектептердің болашақ директорлары белгіленді. Ендігі кезекте, конкурс арқылы ұстаздар жұмысқа қабылданады.

• 30.05.2024
• 141