Маңғыстау облысының әкімі мен Литва Республикасының елшісі ынтымақтастық мәселелерін талқылады

3 маусым күні Маңғыстау облысының әкімі Нұрдәулет Қилыбай Литва Республикасының Қазақстан Республикасындағы Төтенше және Өкілетті Елшісі Эгидиюс Навикасты қабылдады. Кездесу барысында тараптар көлік-логистика, медицина, білім беру салаларындағы әріптестікті кеңейту, ІТ-технологияларды енгізу мәселелерін талқылады, деп хабарлайды облыс әкімінің баспасөз қызметі. 

Литва Республикасының Қазақстан Республикасындағы Төтенше және Өкілетті Елшісі Эгидиюс Навикас Транскаспий халықаралық көлік бағытының мүмкіндіктеріне қызығушылық танытты.

– Қазақстан мен Литва арасындағы ынтымақтастықтың тек экономикалық ғана емес, әлеуметтік-мәдени тұрғыдан да өзара қызықты аспектілері бар. Екі мемлекет арасындағы сыртқы сауда серіктестігінің көрсеткіштері күн сайын артып келеді, бірақ геосаяси жағдай көптеген елдердің даму стратегияларын өзгертіп жатыр. Осылайша, Литва Республикасына баламалы логистикалық бағыттар қажет. Осыған байланысты бізді Транскаспий дәлізі, Ақтау және Құрық теңіз порттарының болашағы қызықтырады, - деді Эгидиюс Навикас.

Аймақ басшысы Нұрдәулет Қилыбай Еуропа мен Азияны байланыстыратын халықаралық бағыттың қуатты транзиттік және көлік-логистикалық әлеуеті Литва мен Маңғыстау облысының ынтымақтастығын кеңейтуде тиімді құрал бола алатынын баса атап өтті. Бүгінде Ақтау және Құрық теңіз порттарының жүк тасымалдау мүмкіндігі жылына 21,2 млн тонна. 

Маңғыстау облысы әкімінің баспасөз қызметі

• 03.06.2024
• 150