Қарағанды облысында жедел жәрдем машиналарына бейне бақылау камералары орнатылуда

Естеріңізде болса осыдан бірер уақыт бұрын қаламызда жедел жәрдем жүргізушісіне шабуыл жасалып, бұл жағдай қоғамда дүрбелең туғызған еді. Осы жайтқа байланысты жедел жәрдем қызметкерлерінің қауіпсіздігін арттыру мақсатында арнайы жұмыс жоспарын әзірлеуді тапсырған болатынмын.

Осыған байланысты қазіргі уақытта аймағымыздағы жедел жәрдем машиналарына оның айналасы мен ішінде болып жатқан жағдайларды түсіріп тұратын бейнекамералар орнатылуда. Төрт камера жүргізушіге, алдыңғы әйнек пен көліктің артқы жағына және салонға бағытталған.

Аталған бейнебақылау жүйесі Жедел басқару орталығымен және жедел жәрдем диспетчерлік қызметімен байланыстырылған.  

Камералар Қарағанды, Теміртау, Саран, Шахтинск, Абай, Балқаш және аудандарда қатынайтын 80 жедел жәрдем көлігіне орнатылатын болады. Қазірдің өзінде аталған бақылау жүйесімен 30 автокөлік жабдықталды. Айдың соңына дейін бейнебақылау жабдықтары  қалған автокөліктерге де орнатылады.  

Бұл шаралар жедел жәрдем қызметкерлерінің қауіпсіздігін арттырып, сондай-ақ оларға қауіп төнген жағдайда жедел әрекет етуге мүмкіндік береді.

• 05.06.2024
• 145