Нұрдәулет Қилыбай Маңғыстауда армяндық кәсіпкерлердің қатысуымен бизнес-форум өткізуді ұсынды

4 маусым күні аймақ басшысы Нұрдәулет Қилыбай Армения Республикасының Қазақстан Республикасындағы Төтенше және Өкілетті Елшісі Армен Гевондянды қабылдады, деп хабарлайды Маңғыстау облысы әкімінің баспасөз қызметі. 

Кездесу барысында тараптар Армения мен Маңғыстау облысы арасындағы сыртқы экономикалық байланыстарды одан әрі нығайту және кеңейту, көлік логистикасының перспективалары, ауыл шаруашылығы мен туризмді дамыту мәселелері бойынша пікір алмасты. 

–  Қазақстан Президентінің 2024 жылғы 14-15 сәуірдегі Армения Республикасына ресми сапары шеңберінде «Қазақстан Республикасы Маңғыстау облысының әкімдігі мен Армения Республикасы Армавир облысы губернаторының әкімшілігі арасындағы ынтымақтастық туралы Меморандумға» қол қойылды. Бұл құжат ауыл шаруашылығы, туризм және мәдениет салаларында бірқатар жаңа бірлескен жобаларды бастауға көмектеседі деп ойлаймын. Екі теңіз портының мүмкіндіктерін ескере отырып, Маңғыстау облысы армян компаниялары үшін қуатты көліктік-логистикалық хабқа айнала алады, бұл бізге қазақстандық нарыққа шығуға көмектесетініне сенімдімін. Біздің кәсіпкерлер азық-түлік тауарларының кең ассортиментін ұсына алады. Оның ішінде біз де бармыз, - деді Арменияның Қазақстан Республикасындағы Төтенше және Өкілетті Елшісі Армен Гевондян.

Өз кезегінде Маңғыстау облысының әкімі Армения мен Маңғыстау облысының іскер топ өкілдерін бір алаңға біріктіруді ұсынып отыр. 

– Маңғыстаулық және армяндық кәсіпкерлердің қатысуымен бірлескен бизнес-форум ұйымдастыруды ұсынамын. Кәсіпорындар бір-бірімен байланысуы керек. Осындай кездесу аясында бірлескен жобаларды жан-жақты талқылауға болады. Өз тарапымнан екіжақты ынтымақтастықты нығайтуға бағытталған барлық бастамаларды қолдауға әрқашан дайын екенімізді атап өткім келеді, – деді Маңғыстау облысының әкімі Нұрдәулет Қилыбай.

• 05.06.2024
• 113