«Мемлекеттік тіл – этносаралық қатынас тілі» тақырыбында дөңгелек үстел өтті

Астана қаласының Достық үйінде ҚР МАМ және Қазақстан халқы Ассамблеясының бастамасымен «Мемлекеттік тіл – этносаралық қатынас тілі» тақырыбында дөңгелек үстел өтті.

Іс-шараға ҚХА Төрағасының орынбасары – Қазақстан Республикасының Президенті Әкімшілігі ҚХА Хатшылығының меңгерушісі М. Әзілханов, Қазақстан Республикасы Мәдениет және ақпарат министрлігі Этносаралық қатынастарды дамыту комитетінің төрағасы Ғ. Шойкин, Қазақстан Республикасы Парламентінің депутаттары, қоғам қайраткерлері мен зиялы қауым өкілдері, филология және лингвистика саласындағы сарапшылар, тілтанушылар, мемлекеттік тілді еркін меңгерген түрлі этностардың өкілдері, сондай-ақ Қазақстан халқы Ассамблеясы мен «Ассамблея жастары» РҚБ өкілдіктерінің мүшелері қатысты және сөз сөйледі.

Іс-шараның мақсаты – Мемлекет басшысының Қазақстан халқы Ассамблеясының XXXIII сессиясында берген мемлекеттік тілді жан-жақты дамыту жөніндегі тапсырмасын іске асыру, сондай-ақ мемлекеттік тілді ілгерілету және оның мәртебесін арттыру.

Айта кету керек, дөңгелек үстел аясында оқыту семинары ұйымдастырылды. Онда еліміздің барлық өңірінен қазақ тілін еркін меңгерген түрлі этнос өкілдерінің жастары, өздерінің тілді үйрену тәжірибесімен бөлісіп, мемлекеттік тілдің қолданылу аясын кеңейту бойынша ұсыныстарын ортаға салды, сондай-ақ мемлекеттік тілдің этносаралық қарым-қатынас тілі ретіндегі рөлін күшейту әдістерін талқылады.

Семинарда танымал медиа тұлғалар мен филология саласындағы сарапшылар, тренерлер тәжірибелерімен бөлісті. Олардың қатарында «Қазақ тілі» халықаралық қоғамының президенті Р. Кенжеханұлы, ҚР Сыртқы істер министрлігі жанындағы «Отандастар қоры» КЕАҚ вице-президенті О. Беркінбаев, республикалық телеарналардың жүргізушілері К. Гринко мен А. Гаврина және басқалар болды.

• 10.06.2024
• 153