Маңғыстау облысының әкімі күзге дейін республикалық маңызы бар автожолдарды ұялы байланыспен қамтамасыз етуді тапсырды

11 маусым күні Маңғыстау облысының әкімі Нұрдәулет Қилыбайдың төрағалығымен өткен аппараттық жиында өңір тұрғындарын сапалы және қолжетімді байланыспен қамтамасыз ету туралы мәселе қозғалды, деп хабарлайды облыс әкімінің баспасөз қызметі. 

Облыстағы 59 елді мекенінің 55-і кең жолақты интернетпен қамтамасыз етілген. 2024 жылы көрсетілетін қызметтердің сапасын жақсарту үшін байланыс операторлары жаңғырту жұмыстарын жүргізіп, 126 жаңа базалық станцияларды салуды жоспарлап отыр.

Цифрлық технологиялар басқармасының басшысы Айдын Хадиевтің мәлімдеуінше, елімізде 2024 – 2027 жылдар аралығында «Қолжетімді интернет» ұлттық жобасы іске асырылады. Бұл ұлттық жоба ауылдық жерлерді талшықты-оптикалық байланыс жүйелерімен қамтамасыз ету және республикалық маңызы бар автожолдарды мобильді интернетпен қамту сынды бірнеше бағыттан тұрады.

Облыс бойынша Бейнеу, Қарақия, Маңғыстау аудандарына қарасты 6 елді-мекенге талшықтық-оптикалық байланыс жүйлерін орнату ісі ұлттық жобаға енгізілді. 

Сондай-ақ, ұлттық жоба аясында республикалық маңызы бар автожолдардың бойында әртүрлі биіктіктегі 13 антенналық-мачтаны салу жоспарлануда.

Аппараттық отырысты қорытындылаған аймақ басшысы Нұрдәулет Қилыбай қыркүйек айына дейін республикалық маңызы бар автожолдарды ұялы байланыспен қамтамасыз етуге тапсырма берді.

-  Қазіргі маңызды мәселе - автожолдарды ұялы байланыспен қамтамасыз ету. Қарақия ойпатының маңындағы жолға күзге дейін мобильді интернет қосу керек. Байланыс операторлары облыстық филиалдарымен, «жергілікті операторлармен» бірлесе отырып, бұл жұмыстарды жылдам әрі сапалы жүзеге асыруы тиіс, деді Нұрдәулет Қилыбай.

Облыс әкімі сондай-ақ Маңғыстау ауданының әкіміне “Ақтау-Бейнеу” жолындағы Ман-Ата асуын да ұялы байланыспен қамтуды тездетуді тапсырды. 

Айта кету керек, Ман-Ата асуында талшықтық-оптикамен және электрмен жабдықтау желілерін төсеу жұмыстары былтыр аяқталғанымен, 2023 жылдың желтоқсан айында қатты дауылдан электр бағаналары құлаған еді. Аймақ басшысы жарты жылдан бері қозғалыссыз тұрған жобаны аудан әкімі мен мердігер компанияға жылдамдатып қалпына келтіруді тапсырды.

• 12.06.2024
• 170