Осакаров ауданы тұрғындарымен әлеуметтік мәселелерді талқыладым

Осакаров ауданының тұрғындарымен кездестім. Өткен жылы аудан бойынша 43 мәселе көтерілген еді. Бүгінде  олардың жартысынан көбі шешілді. Мәселелер білім беру, мәдениет нысандарын жөндеуге, Молодежныйдағы Абай атындағы мектептің аумағын абаттандыруға, Осакаровкадағы спорт алаңдары мен бағдаршамдарды жайластыруға және т.б қатысты болды.

Қарастыруды қажет ететін үлкен мәселелердің бірі Молодежный кентіндегі жылыту сапасы мәселесі еді. Бұл мәселені шешу үшін ауылда жаңа қазандық салынуда. Тұрғындармен кездеспес бұрын аталған нысанда болып қайттым. Мердігер жылыту маусымы басталғанға дейін жұмыстарды аяқтауға уәде берді. Сондай-ақ күзде мұнда  алғашқы музыкалық мектеп ашылады. Бұл мәселе кездесулерде бірнеше рет көтерілген болатын.

Бүгінде ауданда ауыз су мен жол мәселесі шешілуде. Өткен жылы бірнеше ауылда су құбыры желілерінің құрылысы аяқталып, қазір басқа елді-мекендерде тиісті жұмыстар жалғасуда. Биыл Нияз ауылында су құбырын салуды бастаймыз,  сондай-ақ кентішілік жолдарды ретке келтіруді жалғастыратын боламыз.

Аудандарға барған кезде мен медициналық көмек көрсетуге және  білім саласына ерекше назар аударамын. Осы жолы Есіл ауылына барып, медицина қызметкерлері мен мектеп-интернат-колледжінің студенттерімен кездестім.

Кездесуге келіп,  ұсыныс пен пікір айтқан аудан тұрғындарына алғысымды білдіремін.  Тұрғындар көтерген мәселелер бойынша жұмыс жоспары әзірленіп, орындалатын болады.

• 14.06.2024
• 209