Өңірлерде психологиялық қолдау орталықтары ашылуда

ҚР Оқу-ағарту министрлігі балалар мен олардың ата-аналарына, педагогтердің психологиялық әл-ауқатын нығайтуға және сақтауға бағытталған психологиялық қызметтің бірыңғай жүйесін құру бойынша жұмыстар жүргізуде. Бүгінгі таңда Мемлекет басшысының тапсырмасына сәйкес еліміздің әр өңірінде психологиялық қолдау орталықтары ашылуда. Қазіргі уақытта мұндай орталықтар 15 өңірде ашылып, жұмыс жасауда. 
Оқу-ағарту министрлігі психологиялық қолдау орталықтарын дамыту арқылы педагог-психологтардың әлеуетін арттыру бойынша белсенді жұмыс жүргізуде.Орталықтардың қызметін біріздендіру үшін министрлік әдістемелік ұсынымдар әзірледі. Бұл ұсыныстар балаларға жайлы жағдайда бірыңғай модель бойынша орталықтар ашуға көмектеседі. Олар орталықтардың міндеттері, негізгі қызмет бағыттары, ұсынылатын штат кестесі, әр маманның лауазымдық нұсқаулықтары туралы ақпаратты қамтиды. Әйелдер мен балалардың құқықтары мен қауіпсіздігін қамтамасыз ету туралы заңда орталықтарды материалдық-техникалық жабдықтау бойынша тұтас бір тарау көзделген.

Мұндай орталықтардың басты мақсаты – балаларға ғана емес, олардың ата-аналары үшін де қолдау көрсету, сондай-ақ педагогтер үшін бірлесіп кеңесетін, өзара тәжірибелерімен бөлісіп, әдістемелік ұсынымдар алатын орынға айналу. Жыл соңына дейін қалған облыстарда да орталықтар ашылады деп жоспарлануда.

Айта кетейік, орталықтарды ашу бойынша іс-шара Балаларды зорлық-зомбылықтан қорғау, суицидтің алдын алу және олардың құқықтары мен саламаттылығын қамтамасыз ету жөніндегі 2023-2025 жылдарға арналған кешенді жоспарда көзделген.

• 17.06.2024
• 150