Ақтөбедегі су айдындарында 33 бейнебақылау камерасы орнатылады

Шомылу маусымында судағы қауіпсіздік бейнебақылау камералары арқылы бақыланады. Адамдарды келеңсіз, қайғылы жағдайлардан қорғау үшін мұндай шаралар қажет-ақ.  Қазіргі уақытта бейнекамералар өзендерге жақын 9 жерге орнатылды. Барлығы 33 дана болмақ. ТЖ департаменті камералардың көп бөлігісуға шомылуға тыйым салынған орындарға қойылатынын нақтылады. Өйткені, адамдар су айдындарындағы қауіпсіздік ережелерін сақтамағандықтан, жиі бату деректері орын алып жатыр. Жыл басынан бері өңірде 5 адам өзен суына батып кеткен. Шомылу маусымында судағы қауіпсіздік мәселесі облыс әкімі Асхат Шахаровтың қатысуымен өткен жиын барысында қаралды. Өңір басшысы бақылау шараларын күшейтуді және су айдындарында тұрақты рейдтер жүргізуді тапсырды.

«Біз судағы жазатайым оқиғалардың алдын алу үшін, әсіресе балалардың қауіпсіздігі үшін барлық шараларды қолға алуымыз керек. Су айдындары маңын, жағалауды патрульдеу қажет. Шомылу маусымы кезінде балаларды рұқсат етілген жағажайларда жүзуге үйреткен жөн. Балаларға арналған қауіпсіз деп танылған жағажайларды жабдықтап, сол орындарда құтқарушылар кәмелетке толмағандарға жүзуге үйретуі тиіс»,

- деді әкім.

• 19.06.2024
• 88