Маңғыстау облысының әкімі жергілікті өнім өндірушілерді қолдауды тапсырды

17 маусым күні Маңғыстау облысының әкімі Нұрдәулет Қилыбайдың төрағалығымен өңдеу өнеркәсібінің дамуы жөнінде жиын өтіп, атқарылып жатқан жұмыстар мен кедергілер, жергілікті өнімге сұранысты арттыру мәселесі сөз болды, - деп хабарлайды облыс әкімінің баспасөз қызметі.

Биыл өңдеу өнеркәсібі саласында 270 млрд теңге көлемінде өнім шығарып, нақты көлем индексін 101,7%-ға жеткізу жоспарланып отыр.

Облыстық индустриялық-инновациялық даму басқармасының басшысы Венера Мұстапаеваның айтуынша, өңдеу өнеркәсібі саласындағы өнім көлемін ұлғайту мақсатында 2024-2029 жылдары аралығында 23 жоба жүзеге асырылады. Оның ішінде, химиялық өндіріс, газ өңдеу, машина жасау салаларына басымдық берілген.

Оған қоса Маңғыстауда инвесторлардың көмегімен 23,7 трлн теңгеге 9 жоба жүзеге асып жатыр. Егер аталған инвестициялық жобалар уақытылы орындалса, 3 600 тұрақты жұмыс орны құрылады. Ал қазір 6 500 адам өндірістің құрылыс кезеңінде жұмыс істеуде.

Биыл Бейнеу астық терминалының жұмысы қалпына келтіріліп, іске қосылады. Сондай-ақ түтіктер мен сорғыш штангалар шығаратын зауыт пайдалануға беріледі.

Бұдан бөлек арнайы экономикалық аймақты кеңейту жұмыстары қолға алынды. «Ақтау теңіз порты» АЭА» АҚ-нің басқарма төрағасының орынбасары Бағлан Кеңбейіловтың айтуынша, Жаңаөзен қаласының индустриялық аймағын 280,8 га және Бейнеу астық терминалының аумағын 22,5 гектарға кеңейту көзделген. Осылайша, АЭА-ның аумағы кеңейту жұмыстары жүргізілген соң 1 926 гектардан 2 716,4 га ұлғаяды.

Облыс әкімі Нұрдәулет Қилыбай ауыл шаруашылығы, тамақ өнеркәсібі саласындағы жобаларды көбейту және «Жайлы мектеп» ұлттық жобасы аясында жергілікті тауар өндірушілерге қолдау көрсету қажет екенін шегеледі.

«Соңғы уақытта нарықтағы бәсекелестіктің дұрыс жүргізілмеуі салдарынан өңірдегі көп мекеменің жұмысы тоқтап қалды. Бұл олқылықтың орнын толтыру қажет. Алдымен жергілікті кәсіпорындардың жұмысын дұрыс жолға қойып, өнімдеріне сұранысты арттыру өте маңызды. Мұны жобалық-сметалық құжаттарды әзірлегенде ескеріңіздер. Алдын ала жергілікті өнімдерге сараптама жасаңыздар. Өйткені сырттан алынатын кей тауарды жергілікті кәсіпкерлер де шығарып жатыр. Екіншіден, өңдеу өнеркәсібінің тағы бір бағыты ретінде ауыл шаруашылығы саласының дамуына ден қою қажет. Әр ауданнан арнайы экономикалық аймақ ашуды қарастырайық. Сонда біршама жеңілдігі бар экономикалық аймақтарға инвесторлар келіп, ауылдарда жаңа өндірістер ашылып, сәйкесінше жұмыс орындары көбейер еді», - деді облыс әкімі Нұрдәулет Қилыбай.

• 20.06.2024
• 178