Энергетика министрлігінде ШЫҰ мүше мемлекеттердің өкілдерінің қатысуымен энергетикалық ведомстволардың сараптамалық кездесу өтті

2024 жылғы 20 маусымда Қазақстан Республикасының Шанхай ынтымақтастық ұйымы органдарындағы төрағалығы аясында Энергетика министрлігінде ШЫҰ мүше мемлекеттердің өкілдерінің қатысуымен Төртінші энергетика министрлерінің кездесуіне дайындық жөнінде сараптамалық кездесу өтті.

Гибридті форматта өткен отырысқа Қазақстан, Үндістан, Иран, Қытай, Қырғызстан, Пәкістан, Ресей, Тәжікстан, Өзбекстан және ШЫҰ Хатшылығының өкілдері қатысты.

16 сараптамалық отырыстың нәтижесінде, қатысушылар  2030 жылға дейінгі энергетикалық ынтымақтастық стратегиясын мақұлдады. 

Стратегия ынтымақтастықтың негізгі бағыттарын айқындайды. Атап айтқанда, энергетикалық қауіпсіздікті арттыру, энергетика секторын әртараптандыру, төмен көміртекті энергетиканы дамыту, сондай-ақ энергетика саласындағы ғылыми-техникалық және кадрлық ынтымақтастық әлеуетін дамыту салалары.

Стратегия жобасы энергетика саласындағы өзара қатынастарды одан әрі дамыту және нығайту үшін қолайлы жағдайлар жасауға, бірлескен жобаларды іске асыруға жәрдемдесуге, ШЫҰ мүше мемлекеттерінің энергетикалық қауіпсіздігін арттыруға және энергетиканың тұрақты дамуы саласындағы ынтымақтастықты нығайтуға ықпал етеді деп күтілуде.

• 21.06.2024
• 130