Абай ауданының тұрғындарымен кездесіп, ауданның бүгіні мен болашағын талқыладық

Бұл орайда Абайда Саран қаласының үлгісімен индустриалдық аймақты құру жоспарланып отырғанын атап өткім келеді. Қазір біз әріптестерімізбен бірге ауданға инвесторларды тарту бойынша жұмысты жүргізудеміз.  

Ағымдағы істерге келетін болсақ, ТКШ саласында үлкен жұмыстар атқарылуда. Атап айтар болсақ, жаз мезгілінде 62 көпқабатты үйдің қасбеті жөнделіп, 15 ауланың аумағы асфальтталып, жаяу жүргіншілер жолдарын ретке келтіру жалғасады.

Сонымен қатар Дубовка ауылында кәріз желілерін қайта құру басталды. Бүгінгі таңда жоспарланған 30 шақырым құбырлардың 17 шақырымы салынды. Жұмыстар келесі жылы аяқталады. Сондай-ақ кәріз желілері Агроқалашық ауылы мен Абайда да ауыстырылады.  

Біздің басқа қалаларымыз сияқты ауданда жылу маусымына белсенді дайындық жүріп жатыр. Абай, Топар және Южный кентінде жылу желілерінің тоғыз учаскесі жөнделіп, 5,8 км құбыр ауыстырылады.

Кездесу барысында балалардың жазғы демалысты қалай өткізіп жатқандары жайлы айтылды. Биылғы жылдан бастап Абайда балаларға арналған барлық спорт нысандарының тегін болуы қамтамасыз етілді. Олардың қатарында стадион аумағында орналасқан жазғы бассейн де бар.

Жұмыс сапары барысында маған өрт сөндіру техникасымен жарақтандыру барысы жайлы баяндалды. Абай ауданына тоғыз «Ермак» мобильді өрт сөндіру кешені, сондай-ақ су беру құрылғылары, өрт сөндіру жеңдері,  аспалы өрт сөндіргіштер мен арнайы киімдер берілді.

Барлық тұрғындарға өз ауданының болашағына бей-жай қарамай кездесуге келгендері үшін алғысымды білдіремін. Біз өз тарапымыздан ауданды көркейтуге бар күш-жігерімізді салатын боламыз.

• 01.07.2024
• 140