Бүгін Президент жанындағы Орталық коммуникациялар қызметінің алаңында өткен баспасөз конференциясында Ұлттық экономика вице-министрі Азамат Әмрин және Қаржы вице-министрі Ержан Біржанов жаңа Салық кодексінің негізгі тәсілдері мен жаңашылдықтарын таныстырды

Өз сөзінде Азамат Әмрин әділ салық салу мен әкімшілендіру үдерістерін оңайлатуға баса назар аударылғанын атап өтті. Жаңа тәсілдер мен жоспарланған өзгерістер Салық саясатының тұжырымдамасында көрсетіледі, ал түйткілді мәселелерді бірізді түсіндіру үшін Премьер-Министрдің орынбасары деңгейінде Әдістемелік кеңес құру жоспарлануда. Кеңес жұмысына «Атамекен» ҰКП, сарапшылар мен салалық мемлекеттік органдар тартылады.

ҚҚС (қосылған құн салығы) мөлшерлемесі 12% деңгейінде сақталады, ал салықты қайтаруды жеделдету үшін процесс толығымен автоматтандырылады. Корпоративтік табыс салығының дифференциалды мөлшерлемесін енгізу ұсынылады. Базалық мөлшерлеме 20% деңгейінде сақталады, банк секторы мен ойын бизнесі үшін мөлшерлеме 25% деңгейінде белгіленеді. Өңдеу өнеркәсібі, қаржылық лизинг және әлеуметтік сала үшін мөлшерлеме 10% дейін төмендейді, сондай-ақ ауыл шаруашылығы өндірушілері үшін мөлшерлеме 3% деңгейінде сақталады.

Инвестицияларды ынталандыру үшін инвестициялық келісімшарттар және АЭА қатысушылары бойынша КТС, жер салығы және мүлік салығынан 100% босату қарастырылған.

Сондай-ақ, азаматтардың БЖЗҚ (бірыңғай жинақтаушы зейнетақы қоры) төлемдерінен 10% жеке табыс салығын алып тастау жоспарлануда. Бұл зейнеткерлерді қосымша қолдау болып табылады.

 «Сән-салтанат» заттарына салық салуға келер болсақ, жалпы құны 450 млн теңгеден асатын жылжымайтын мүлік нысандары бойынша мүлік салығының жоғарылатылған мөлшерлемелері, кедендік құны 75 млн теңгеден асатын жеңіл автокөліктер бойынша көлік салығының жоғарылатылған мөлшерлемелері, қымбат алкоголь мен темекі өнімдері, сондай-ақ қымбат теңіз кемелері мен әуе көліктеріне 10% мөлшерінде қосымша акциз салу ұсынылады.

«Барлық жеке тұлғалар үшін көлік салығы мөлшерлемесін төмендету ұсынылады: егер көліктің қызмет етe мерзімі 10 жылдан асса мөлшерлеме 30%-ға, ал егер де 20 жылдан асса 50%-ға төмендейді», - деп атап өтті вице-министр.

Бұдан бөлек, құжатта тиімсіз пайдаланылатын жерлерге базалық мөлшерлемеден 40 есе жоғары жер салығын енгізу ұсынылады.

Жаңа Салық кодексінің жобасы 2024 жылғы 5 шілдеге дейін талқылау үшін «Ашық НҚА» порталында қолжетімді.

• 05.07.2024
• 212