«Әлемде отын ретінде қолданылмайды»: Энергетика министрі Премьер-министрден сұйытылған мұнай газының мұнай-газ-химиясы үшін стратегиялық бағытын бекітуді сұрады

Қазақстанның энергетика министрі Алмасадам Сәтқалиев үкімет отырысында елдің газ саласының дамуы туралы есеп берді.

Министрдің баяндамасынан:

Қазақстан Республикасы Ішкі істер министрлігінің мәліметі бойынша, 2023 жылы газ қозғалтқышы бар автомобильдер саны 582 мың бірлікті құрады, бұл 2022 жылмен салыстырғанда 18%-ға артқан (491 мың бірлік).

Сұйытылған газ бағасының төмен деңгейі белгіленуіне байланысты ел автокөлік иелерінің осы отын түріне көшуі байқалып, бұл өз кезегінде тұтынудың артуына себеп болып отыр.

Тұтыну талдауы бойынша, әсіресе шекаралас аймақтарда сұйытылған газға сұраныстың артуын көрсетіп отыр (көрші мемлекеттермен салыстырғанда төмен бағасына байланысты).

Министрлік тарапынан бөлінетін сұйытылған газ көлемінің бір бөлігі мұнай-химия өнімдерін шығаратын өнеркәсіптік кәсіпорындарға бағытталады.

Осы деректерді ескере отырып, сұйытылған газ тапшылығының көлемі шамамен 20-25%-ды құрауы мүмкін деп болжануда.

Елде полипропилен және метил-трет-бутил эфирін өндіретін 3 зауыт жұмыс істейді. Олар шикізат ретінде сұйытылған мұнай газын пайдаланады. Мұнда жалпы инвестиция көлемі 2,7 млрд долларды құрайды, сондай-а 1,7 мың жұмыс орны құрылды.

Сондай-ақ, бутадиен өндіру жобасын іске асыру мәселесі қарастырылуда. Оның  шикізаты бутан Теңіз кен орнынан жеткізіледі. Жобаның құны 1,4 млрд долларды құрап, тұрақты түрде 750  жұмыс орнын, ілеспе салаларда 7500 жұмыс орны ашуға сеп болмақ.

Қазіргі уақытта алкил және полипропилен өндіру жобалары бар, оларға 300 млн доллар инвестиция салу және 2 мың жұмыс орнын құру жоспарлануда.

Осы инвестициялық жобаларды іске асыру үшін 345 мың тонна/жылына сұйытылған мұнай газы қажет.

Сұйытылған мұнай газының мұнай-газ химия өнеркәсібі жобаларын іске асырудағы маңыздылығын ескере отырып, біз мыналарды қажет деп санаймыз:

- Мемлекеттік жоспарлау жүйесінде сұйытылған мұнай газын мұнай-газ химиясына стратегиялық бағыт ретінде бекіту;

- Сұйытылған мұнай газын негізге ала отырып, мұнай-газ химиясын дамытудың қажеттілігін кең ауқымда түсіндіру алгоритмін әзірлеу.

• 17.07.2024
• 178