Қарағанды - еліміздегі цифрландыру және IT-салаcы орталықтарының бірі

Бүгінде біздің қаламызда ірі IT-компаниялар жұмыс жасап, жасанды интеллект күнделікті өмірімізге еніп жатыр. Мұның барлығы тұрғындардың мәселелерін жедел шешуге, сондай-ақ басқару жүйесін тиімді етуге мүмкіндік беріп отыр.

Мысалға алар болсақ, аймақтағы 49 медициналық ұйымда жасанды интеллект арқылы медициналық зерттеулерді түсіндіру сапасын жақсартатын PACS-жүйесі жұмыс істейді. Осы уақыт ішінде 2,7 миллионнан астам радиологиялық зерттеулер жүргізілді.

Қауіпсіздікті қамтамасыз ету үшін 1 шілдеден бастап Қарағанды мен Теміртауда 22 жаңа «Жаяу жүргінші» кешені орнатылды. Бұл жүйелер салынатын айыппұлдарға бейнедәлелдерді бере отырып, жаяу жүргіншілер өткелдеріндегі бұзушылықтарды тіркейді. Бұл технология жол төсемін бақылау және шұңқырларды анықтау үшін де қолданылады.

Биыл біз жолдардағы кептелістерді азайту үшін «Ақылды бағдаршамдар» жобасын іске қосып жатырмыз. Жаңа жүйе көлік ағынының қарқындылығын ескере отырып, жол қиылыстарындағы қозғалысты реттейтін болады.

Ал күзде облыс мектептерінде жеке тұлғаны биометриялық сәйкестендіру жүйесі енгізіледі. Оқушылар алақандарын басып мектепке, кітапханаға кіріп, түскі астың ақысын төлей алатын болады. Ата-аналар болса, балаларының қозғалысы туралы хабарлама алып, олардың  тамақтануын бақылай алады. 2024 жылы бұл жоба 132 мектепті, ал 2025 жылы тағы 268 мектепті қамтып, облыс аумағында 100% толықтай енгізіледі.

Қазіргі уақытта аймағымызда «Террикон даласы» IT-хабы мен Қарағанды индустриалдық университеті жасанды интеллект бойынша мамандарды белсенді даярлауда. Сондай-ақ біз тұрғындарымыздың құпия деректері қорғалуы үшін қауіпсіздік шараларына ерекше назар аударамыз. Барлық тәуекелдер жаңа технологияларды енгізетін компаниялармен жасалған шарттарда ескеріледі.

Біздің мамандар бұл саланы одан әрі дамытып, ЖИ қолданылу аясын  кеңейтетіндеріне сенімдімін. Мұның бәрі тұрғындардың өмір сапасына оң әсер етіп, олардың қауіпсіздігін арттыруы керек.

• 31.07.2024
• 179