Маңғыстау «Таза Қазақстан» акциясына белсенді қатысуын жалғастыруда

Мемлекет басшысының бастамасымен қолға алынған «Таза Қазақстан» республикалық акциясы аясында облыс тұрғындары туған жерді абаттандыруға тұрақты түрде белсене атсалысуда. Бүгін Маңғыстау облысының түкпір-түкпірінде тұрғындар кезекті сенбілікке шықты. Экологиялық шараға жүздеген қатысушылар, оның ішінде мемлекеттік қызметшілер, қоғамдық ұйымдар, еріктілер, студенттер, белсенділер және мүдделі азаматтар қатысты.

Басты мақсат – экологиялық мәселелерге назар аударып, қоршаған ортаға қамқорлық көрсету. Акция Мұнайлы ауданынына қарасты «Ыбықты Сай» шатқалы, «Өмір глампинг» демалыс аймағының маңы, Кіші Оймаша көлінің маңы, қатты тұрмыстық қалдықтар полигонының айналасы және Баянды, Басқұдық ауылындағы Союз полигонының аумағында өткізілді.

Акцияға Мұнайлы ауданынан 18 мекеме белсене атсалысты. 400-ден астам адам мен 18 арнайы техника жұмылдырылған акция нәтижесінде 36 тонна қоқыс шығарылды.

Осылайша, «Ыбықты Сай» шатқалынан 8 тонна, Баянды ауылынан 3 тонна, «Союз» полигонынан 16 тонна, теңіз жағалауынан 1 тонна, «Кіші Оймаша» көлінен 8 тонна қоқыс шығарылды.

– «Таза Қазақстан» жалпыұлттық акциясының маңыздылығын Мемлекет басшысы Қазақстан халқы Ассамблеясының сессиясында атап өтті. Ел Президенті қоршаған ортаның жай-күйі ортақ жауапкершілік екеніне ерекше назар аударды. Бұл акция 5 жерде бір уақытта өткізіліп, алдағы уақытта да жалғасын табатын болады», - деді облыстық жастар көшбасшысы Фазылбек Абылай.

Айта өтейік, «Таза Қазақстан» республикалық акциясына мемлекеттік органдар мен жеке ұйымдар, шаруа қожалықтары, жастар, еріктілер және үкіметтік емес ұйымдар, мәслихат депутаттары, пәтер иелерінің коорпоративі, мүлік иелерінің бірлестігі өкілдері қатысты. «Таза Қазақстан» жалпыұлттық акциясы аясында барлығы 30 мыңнан астам адам қатысып, 49 қоғамдық бақ пен саябақ абаттандырылды, 1190 тонна қоқыс шығарылып, 9,5 мыңнан астам ағаштар мен бұталар отырғызылды.

• 05.08.2024
• 127