Бейнеу терминалының мүмкіндіктері Ауғанстан, Түркіменстан және Өзбекстанға ұсынылды

Вице-премьер Серік Жұманғарин Ауғанстан, Түрікменстан және Өзбекстан делегацияларымен бірге Бейнеу астық терминалында болып, оның жағдайы және мүмкіндіктерімен танысты.

Аумағы 26 гектар болатын Бейнеу терминалы Маңғыстау облысының аумағында орналасқан және одан қазақ-түрікмен шекарасына тікелей қатынауға болады. Бұл 8 шақырымдық теміржол жолдары мен меншікті жылжымалы құрамы бар перспективалы логистикалық хаб. Терминалдың қуаттылығы бір мезгілде 100 мың тонна астықты сақтауға, тәулігіне 500 вагонға дейін астықты қабылдауға, жылына 2 миллион тоннаға дейін астықты буып-түйілген күйде астық тасымалына жіберуге мүмкіндік береді. Алдағы уақытта терминалдың сыйымдылығы кеңейтілетін болады.  

Терминалда тәулігіне 320 тонна ұн мен 80 тонна кебек өндіруге мүмкіндік беретін диірмен кешені де бар. Қазіргі уақытта жабдықты жаңғырту процесі жүріп жатыр, одан кейін жалпы қуаттылығы тәулігіне 400 тонна ұн шығаратын екі желі іске қосылады.  Қуаттылығы тәулігіне 80 тонна құрама жем өндірісі жолға қойылған. Жаңғыртудан кейін өнімділік тәулігіне 240 тоннаға дейін ұлғайтылады.

Сол күні Ауғанстан өкілдері азық-түлік корпорациясының басшысымен және Бейнеу терминалының басшылығымен терминал арқылы астық жеткізу мүмкіндігін талқылады. Бейнеу терминалы арқылы қазақстандық бидайды Ауғанстан мен Пәкістанға жеткізудің негізгі және тұрақты бағытын ұйымдастыру мүмкіндігі қарастырылуда, бұл шекаралас аудандарда қосымша қоймалар салу мен Түркіменстан аумағы арқылы логистиканы құруды талап етеді. Енді мүдделі тараптар қазақстандық астықты жеткізудің жаңа экспорттық бағытын құруды егжей-тегжейлі талқылайтын болады.

• 05.08.2024
• 117